काठमाडौँ, १२ कातिक ।  केही दिनदेखि अस्वस्थ प्रधानमन्त्री केपी शर्मा ओलीको स्वास्थ्यमा थप समस्या देखिएपछि त्रिभुवन विश्वविद्यालय शिक्षण अस्पताल (टिचिङ) मा भर्ना भएका छन् ।
उनको अहिले शिक्षण अस्पतालभित्र रहेको मनमोहन हार्ट सेन्टरमा राखेर उपचार भइरहेको छ । सोमबार बिहान अस्पताल भर्ना भएका प्रधानमन्त्री केपी शर्मा ओलीलाई भेट्न नेकपाका अध्यक्ष पुष्पकमल दाहाल प्रचण्ड महाराजगञ्जस्थित त्रिवि शिक्षण अस्पताल पुगेर प्रधानमन्त्री अाेलीकाे स्वास्थ्य अवस्थाबारे जानकारी लिएका छन्।

केहीबेरअघि अध्यक्ष प्रचण्डले प्रधानमन्त्रीलाई राखिएको मनमोहन कार्डियोलोजी भास्कुलर सेन्टर पुगेर उनको स्वास्थ्य अवस्था बुझेको उनको सचिवालयले जनाएको छ।

अहिले अस्पताल परिसरमा नेकपा नेता कार्यकर्ता र शुभेच्छुकको भीड लागेको छ।

नेकपा महासचिव बिष्णु पौडेल र उपप्रधान तथा रक्षा मन्त्री ईश्वर पोखरेल, पूर्वप्रधानमन्त्री झलनाथ खनाल र गृहमन्त्री रामबहादुर थापा प्रधानमन्त्री अाेलीलाइ भेट्न पुगेका थिए ।

यसैबीच अस्पतालले प्रधानमन्त्रीको स्वास्थ्यबारे पहिलो रिपोर्ट दिएको छ । अस्पतालका अनुसार उनको छातिमा संक्रमण देखिएको छ भने शरिरमा चिनीको मात्र असन्तुलित देखिएको छ ।

प्रधानमन्त्री अाेलीकाे स्वास्थ्य स्थितिमा क्रमिक सुधार हुदै गएकाे र अरु स्वास्थ्य स्थिति सामान्य रहेको कार्यकारी निर्देशक उत्तमकृष्ण श्रेष्ठले जनाएका छन् ।

प्रधानमन्त्री ओली केही दिन यता बिरामी परेका थिए। स्वास्थ्यका कारण उनी शनिबार पार्टीले आयोजना गरेको चियापानमा सहभागी भएका थिएनन्।