कंचनपुर । खानेपानी मन्त्री बिना मगरले सुदुर पश्चिम लगायत जिल्लाहरुको एकीकृत विकास रणनीति तयार गरि सरकार अघि बढिरहेको बताउनु भएको छ ।
कंचनपुर स्थित प्रथम बेलौरी पर्यटन महोत्सव तथा कृषि औद्योगिक ब्यापार मेलाको उद्घाटन गर्दै खानेपानी मन्त्री मगरले यो क्षेत्रको विकास निर्माणका लागि महत्त्वपूर्ण गुरु योजना तयार गरिरहेको जानकारी दिनु भयो ।
उहाँले स्थानीय सरकार, प्रदेश र संघ सरकार बीच समन्वय गरेर विकास निर्माणको गुरु योजना अघि बढाउने बताउनु भयो । गुरु योजना सहित समग्र निर्वाचन क्षेत्रको विकासमा ध्यान केन्द्रित गरिरहेको उहाँले प्रष्ट पार्नु भयो ।

कार्यक्रमलाई सम्बोधन गर्दै उहाँले भन्नू भयो, ‘ विकास निर्माणको काममा सरकार प्रतिबद्ध छ । विकासको काममा प्रतिपक्षी दलले अवरोध गर्न खोजिरहेको भान भैरहेको छ । सरकार प्रति भ्रम सिर्जना गर्न खोजिएको छ । विकास निर्माणको कार्यमा अघि बढ्न खोजेको सरकार प्रति यस्तो भ्रम सिर्जना गर्न खोज्नु कदापि सह्य हुँदैन ।’
कंचनपुरको बेलौरीलाई नाका बनाउने काममा सरकार गम्भीर भएर लागिपरेको उहाँको भनाइ छ । कंचनपुर जिल्लालाई पर्यटकीय जिल्लाको रूपमा चिनाउन पर्यटनको पूर्वाधारमा जोड दिइने उहाँले बताउनु भयो ।