काठमाडौं, ९ असोज । सरकार र यातायाता व्यवसायीबीच सहमति बनेपछि दशैंका लागि अग्रिम टिकट बुकिङ आजबाट खुला भएको छ ।
पेट्रोलियम पदार्थमा मूल्यवृद्धिपछि चिँडिएका यातायात व्यवसायी सार्वजनिक सवारी साधनमा १० प्रतिशत भाडा बढाउने सरकारी निर्णयपछि टिकट खोल्न राजी भएका हुन् ।
२ सय ४५ वटा यातायात समितिको रोक्का बैंक खाता खोल्न व्यवसायीले दिएको दवाव, सरकारले नमानेपछि टिकट बुकिङ अन्योलमा परेको थियो ।
काठमाडौंका बिभिन्न काउन्टरबाट टिकट वितरण सुरु गरेको यातायात व्यवसायी राष्ट्रिय महासंघले टिकट काट्दा यात्रुलाई सहज बनाउन र छुट्ने वसको उचित व्यवस्थापनका लागि छुट्टाछुट्टै समिति समेत गठन गरेको छ ।

काठमाडौंमा रहेका झण्डै ३५ लाख सर्वसाधारण यो पटक दशैं मान्न घर जाने अनुमान ट्राफिक प्रहरीको छ । गत भदौ ३१ गते यातायात व्यवस्था विभाग र यातायात व्यवसायीबीच बसेको बैठकले असोज ५ गतेदेखि खुल्ला गर्ने निर्णय गरेपनि पेट्रोलियम पदार्थको मूल्यवृद्धि भएपछि व्यवसायी पछि हटेका थिए ।