चितवन,२८ भाद्र । भरतपुर महानगरपालिकाले नगर भित्र सिटी हल बनाउने भएको छ ।  जिल्ला प्रहरी कार्यालय अगाडि रहेको गेष्ट हाउस चौरमा सिटी हल निमार्ण गरिने भएको हो ।
महानगरपालिकाको आग्रहमा सबै राजीतिक दलहरुबीच गेष्ट हाउस चौरमा अत्याधुनिक अन्तर्राष्ट्रिय स्तरको सिटी बनाउने सहमति भएको महानगर प्रमुख रेनु दाहालले जानकारी दिईन । भरतपुर महानगरपालिका ,नेकपा, नेपाली कांग्रेस, जिल्ला समन्वय समितिमा भएको छलफलले महानगरको सिटी हल गेष्ट हाउस चौरमै बनाउने सहमति भएको हो ।

यसअघि क्यान्सर अस्पतालमा सिटी हल बनाउने निर्णय महानगरपालिकाले विभिन्न राजनीतिक दलहरुको विरोधका कारण स्थगित गरेको थियो । ‘पाँचहजार क्षमताको अन्तर्राष्ट्रिय स्तरको अत्याधुनिक सिटी हल बनाउने गरी महानगरपालिकाले प्रक्रिया अघि बढाउँछ’ महानगर प्रमुख रेनु दाहालले भनिन् , ‘सिटी हलको लागि ५० करोडको बजेट समेत निकासा भइसकेको छ ।’
महानगरले बनाउन लागेको सिटी हल देशकै नमुना बन्ने महानगर प्रमुख दाहालको भनाइ थियो । झन्डै ५ बिघामा सिटी हल बन्ने भएको छ ।

गेष्ट हाउस चौरको जग्गा जिल्ला समन्वय समितिको मातहतमा रहेको छ । ‘गेष्ट हाउस चौर जिल्ला समन्वय समितिको मातहतमा छ, हामी सिटी हल बनाउन उपलव्ध गराउँछौँ’ जिल्ला समन्वय समितिका प्रमुख कृष्णकुमार डल्लाकोटीले भने। उनका अनुसार सिटी हलको लागि जग्गा अपुग हुँदैन । साढे ४ विघा जग्गा भएकोले पनि अत्याधुनिक अन्तर्राष्ट्रिय स्तरको सिटी हल बनाउन पुग्ने डल्लाकोटीले   बताए ।