संखुवासभा, ५ भाद्र । मकालु बरुण राष्ट्रिय निकुञ्ज क्षेत्रमा भालुको आंतक बढेको छ ।

आइतबार सोलुको महाकुलुङ गाउँपालिका वडा नम्बर–३, बोक्सुवारमा भालुको आक्रमणबाट स्थानीय पासाङदावा शेर्पा घाइते हुनुभएको छ ।
खेतबारीमा लगाएको मकै भालुले सखाप पारेपछि बारीमा मकै रुघ्न बसेको बेला भालुले उल्टै आफूलाई आक्रमण गरेर घाइते बनाएको शेर्पाले बताउनुभयो ।

राति भालु लखेट्न होहल्ला गर्दै कराएको थिएँ, भालुले उल्टै आफै माथि आइलाग्यो । अरु गाउँलेहरु आएर बचाए ।’
‘गाउँभरिका मानिसहरु रातभरि सुत्दैनौं, एकछिन सुत्न गए बारीमा पाक्न लागेको मकै सबै सखाप हुन्छ’, शेर्पाले भन्नुभयो, ‘दिनको समयभन्दा रातको समयमा भालु मकै खान बढी आउन थालेको छ ।

केही समय अघिसम्म दिउँसो आउँथ्यो, दिउँसो धेरै मान्छे डिउटी बस्न थालेपछि राति आउन थालेको छ ।

भालुको आक्रमणबाट गम्भीर घाइते भएका शेर्पाको शरिरका विभिन्न भागहरुमा ठूला–ठूला चोट र घाउ भएको छ । उहाँको तत्कालै सुविधासम्पन्न अस्पतालमा उपचार गराउनु पर्ने भए पनि जडिबुटीको भरमा घरमा नै उपचार गरिराख्नुभएको छ ।

‘उपचार गर्न जान गाउँदेखि ५÷६ घण्टा टाढा छेस्काम उप–स्वास्थ्य चौकी पुग्नुपर्छ । हिँडेर जान सक्दिँन, गाउँका साथीभाइलाई बोकाएर लैजान गोरेटो बाटो समेत राम्रो छैन । बोक्ने सक्ने बलियो मान्छे पाउन पनि मुस्किल छ’, शेर्पाले मन्द स्वरमा भन्नुभयो ।

वन्यजन्तु मा¥यो भने उल्टै कानुन लाग्छ भनेर वन्यजन्तुको हानीनोक्सानी सहन बाध्य भएको उहाँले बताउनुभयो ।
सरकारले वन्यजन्तुको संरक्षण गर्न आवश्यक छ तर स्थानीय गाउँलेहरुको पीडा र पीरमार्का समेत सरकारले बुझ्नु पर्ने उहाँहरुको भनाई छ ।

मानवीय सुरुक्षा पहिलो कुरो भएको भन्र्दै स्थानीयहरु आत्मरक्षा र आफ्नो पशु तथा अन्नबालीको सुरक्षाका लागि मध्यवर्ती क्षेत्रको संवेदनशिल क्षेत्रमा बसोबास गर्ने नागरिकहरुले बन्दुक राख्न पाउनु पर्ने उहाँहरुको माग छ ।