चितवन ,२७ साउन । चितवनको रत्ननगर नगरपालिकामा भएकोे कर वृद्धिको विरोधमा रिले अनसन सुरु भएको छ । नेपाली काँग्रेंस लगायत रत्ननगर नगरपालिकामा क्रियाशिल विभिन्न सात राजनितिक दलले संयुक्त रुपमा विरोध स्वरुप रिले अनसन बसेका हुन् ।

नगरपालिकाले गरेको कर वृद्धि लगायतको ११ विषयमा संयुक्त संघर्ष समिती आन्दोलित हुँदै आएको थियो । चरणबद्ध आन्दोलनको अन्य विभिन्न कार्यक्रम गर्दा समेत नगरपालिका नेतृत्वले आफुहरुको माग सुनुवाई नगरेको भन्दै रिले अनसनमा बस्नु परेको नेपाली कांग्रेस रत्ननगर नगर समितीका सभापति रुपनराज घिमिरेले बताए ।

रत्ननगर नगरपलिकाले १ हजार प्रतिशतसम्म कर वृद्धि गरेको भन्दै विभिन्न राजनितिक दलले विरोध गर्दै आएका छन् । उनीहरुले अनसनसँगै राजश्व शाखा समेत बन्द गराएका छन् ।

अघिल्लो बर्ष ३ सय १५ रुपैयाँ कर तिरेको तर यसबर्ष कर बृद्धि भएर ६ हजार २ सय ४० रुपैयाँँ तिरेको रत्ननगर नगरपालिका वडा नम्बर ९ का स्थानिय गोपाल शर्माले बताए । अत्याधिक रुपमा बढाइएको करले जनता मर्कामा परेको उनले गुनासो गरे ।

रत्ननगर नगरपालिकाले भने करको दरमा वृद्धि नभएको तर जग्गाको मुल्याकंन बढेकोले करको रकम बढेको बताउदै आएको छ । अघिल्लो बर्ष १५ लाख ६१ हजार रुपैयाँ मुल्याकंन भएको जग्गाको अहिले मुल्याकंन बढेर ८६ लाख ९७ हजार पुगेकोले करको रकम बढेको नगरपालिकाको दावी रहेको छ ।

मालपोत कार्यालयको मुल्याकंन अनुसार जग्गाको मुल्याकंन गरेको नगरपालिकाले जनाएको छ । स्थानियले भने जग्गा बिक्रीवितरण गर्दा एक पटक तिर्ने करको मुल्याकंन र प्रत्येक बर्ष तिर्ने करको लागि मुल्याकंन एकै बनाउनु व्यवहारिक नहुने बताएका छन् । आन्दोलमा उत्रिएका दलहरुले बृद्धि भएको कर तत्काल फिर्ता हुनुपर्ने माग राखेका छन् ।