काठमाडौं, १८ साउन । प्रस्तावित प्रधानन्यायाधीश दीपकराज जोशीको सुनुवाइ आज शुक्रबार हुदैंछ । संसदीय सुनुवाई समितीले जोशीका बारेमा आज निर्णय गर्ने आज शुक्रवार सुनुवाई समितिको बैठक बस्ने भएको हो ।
गत विहीवारदेखि संसदीय सुनुवाइ प्रकृया थालिए पनि अहिलेसम्म प्रस्तावित प्रधानन्यायाधीश जोशीको नाम अनुमोदन गर्ने या नगर्ने भन्ने विषय अन्योलमै छ ।

कांग्रेस र राजपा जोशीका पक्षमा सकरात्मक देखिएका छन् भने सत्ता पक्ष नेकपा शैक्षिक प्रमाणपत्र विवादमा परेको भन्दै अनुमोदन गर्न आनाकानी गरेका छन् । यता, संसदीय सुनुवाईका क्रममा निर्णय भईनसक्दै सरकारविरुद्ध प्रेसवक्तव्य जारी गर्दै ‘न्यायपालिकामाथि हस्तक्षेप’ भनेकोमा प्रधानमन्त्री ओली जोशीसँग क्रुद्ध छन् । नेकपामा अर्का अध्यक्ष पुष्पकमल दाहाल प्रचण्डले पनि उनलाई बोकेर हिँड्ने अवस्था नरहेको बताइसकेका छन् । जोशी अहिले नेपाली कांग्रेसका केही नेता, नेपाल बार एशोसीएशनका पदाधिकारीलाई लिएर संसदीय सुनुवाई समितिविरुद्ध सक्रिय छन् ।

सर्वसम्मतीमा जोशीलाई अयोग्य ठहर गर्नका लागि नेकपामा सांसदहरूले कांग्रेसलाई गरेको आग्रहका आधारमा नै निर्णयको मिति सरिरहेको छ । तर, नेपाली कांग्रेसले छानविनका लागि उपसमितिको माग राखी अड्को थापेको नेकपाको बुझाई छ । उपसमिति गठनको साटो सुनुवाईको प्रक्रिया लम्बिएको खण्डमा महाअभियोग दर्ता गरी दुई तिहाई बहुमतले जोशीलाई हटाउने रणनीतिमा नेकपा पुगेको  स्रोतले जानकारी दिएको छ । ।
‘उहाँले सहजीकरण गर्नु भएन भने त्यसै हिसाबको निर्णय हुन्छ’, स्रोतले भन्यो,‘उहाँका विषयमा आएका विवादास्पद विषय जान्दाजान्दै न्यायपालीकामा अयोग्य व्यक्तिलाई प्रमुखको जिम्मा दिन सकिँदैन ।’

यसअघि जोशीले राजनीतिक कुरोकानी मिलाउने सन्दर्भमा राजनीतिक भेटलाई तिव्रता पनि दिए । औपचारिक र अनौपचारिक हिसाबले उनको दौडधुप जारी रहे पनि सत्तारुढ दलको राजीनामा दिनू भन्ने दबाबमा जोशी रहेका छन् ।