पोखरा, १७ साउन। ‘फेवातालको आँगनमा लैलै माछापुच्छ्रे छायाँ’ प्रकाश श्रेष्ठको यो चर्चित गीत हो । माछापुच्छ्रेको छायाँ र त्यसको बिम्बबारे केही चर्चा भए पनि यो अझै पर्यटकीय गन्तब्य बन्न सकिरहेको छैन ।

तर पोखरा महानगरपालिकासँगको समन्वयमा प्रदेश सरकारले यसलाई अझै विशेषता थपेर ब्रान्डिङ गर्दै पर्यटकीय आकर्षणको रुपमा विकास गर्ने भएको छ ।

फेवाको माछापुच्छ्रे छायाँमा नेपाली झन्डा राखेर पर्यटकीय आकर्षण बढाउने योजना अगाडि सारेको हो । फेवातालमा माछापुच्छ्रे छायाँमाथि अब नेपाली झन्डा पनि देखिने छ ।

गण्डकी सरकारका प्रवक्ता रामशरण बस्नेतले जानकारी दिए अनुसार अब सरकारले ड्यामसाइड पार्कलाई झन्डा पार्कको रुपमा विकास गर्ने योजना बनाएको छ । अहिलेसम्म फेवातालमा परेको माछापुच्छ्रे छायाँसँगै फोटो खिचेर जान सकिन्थ्यो भने अब फेवाको माछापुच्छ्रे छायाँमात्रै होइन नेपालको झन्डा पनि फोटोमा कैद हुनेछ । ‘पोखरा नेपाल’ लेखिएको नेपाली झन्डा पनि माछापुच्छ्रे छायाँसँगै देखाइने छ ।

झन्डा पार्कको रुपमा विकास गर्न एक सय मिटर अग्लो झन्डा त्यहाँ राखिने छ । र त्यो झन्डाको छायाँ माछापुच्छ्रेको शिरमा हुनेछ । उक्त योजनाका लागि पोखरा महानगरपालिका र प्रदेश सरकारले आधा(आधा खर्च व्यहोर्ने गरी एक करोड रुपैयाँ छुट्याइएको छ ।

प्रवक्ता बस्नेतले भने पर्यटक आकर्षण मात्र होइन यो राष्ट्रप्रतिको भक्ति पनि हो यसले नेपालको स्वभिमानलाई विश्व सामु उच्च राख्ने छ ।
झण्डा पार्कको निर्माण तथा झण्डा नै राख्दा पनि पर्यावरणलाई नबिग्रिने तरिकाले काम गरिने पोखरा महानगरपालिकाले जनाएको छ । पोखरा महानगरपालिकाले यसको टेन्डर आहृवानको तयारीसमेत गरिरहेको छ ।