चितवन , ३२ असार । चितवन जिल्लालाई आज पुर्ण खोप सुनिश्चित जिल्ला घोषणा गरिएको छ । जिल्ला भरका १५ महिनासम्मका ७ हजार ५ सय ८९ बालबालिकाले पुर्ण खोप लगाएको सुनिश्चित भएपछि चितवनलाई पुर्ण खोप सुनिश्चित जिल्ला घोषणा गरिएको हो ।

पुर्ण खोप सुनिश्चित घोषणा कार्यक्रमकी प्रमुख अतिथी स्वास्थ्य तथा जनसंख्या राज्यमन्त्री पद्मा अर्यालले चितवन जिल्लालाई पुर्ण खोप सुनिश्चित जिल्ला घोषणा गरेकी हुन् । घोषणासँगै राज्यमन्त्री अर्यालले जिल्ला समन्वय समिती र जिल्ला जनस्वास्थ्य कार्यालयलाई पुर्ण खोप सुनिश्चित जिल्लाको प्रमाणपत्र प्रदान गरेकी थिइन् ।

चितवनको भरतपुर महानगरपालिका पनि आज नै पुर्ण खोप सुनिश्चित महानगरपालिका घोषित भएको छ । चितवनको अन्य नगरपालिका र गाँउपालिका यसअघि नै पुर्ण खोप सुनिश्चित घोषणा भइसकेका थिए । भरतपुर महानगरपालिकाको २९ वटा वडाहरुमध्य १८ वटा वडाहरु यसअघि नै पुर्ण खोप सुनिश्चित वडा घोषणा भएको र बाकी ११ वटा वडाहरुलाई आज पुर्ण खोप सुनिश्चित वडा घोषणा गरिएको थियो ।

सबैवडा हुदै महानगरपालिका पुर्ण खोप सुनिश्चित घोषणा भएसँगै समग्र जिल्ला नै पुर्ण खोप सुनिश्चित जिल्ला घोषणा भएको हो । जिल्ला खोप समन्वय समितीका प्रमुख कृष्णकुमार डल्लाकोटीले भरतपुर महानगरपालिकाकी प्रमुख रेणु दहाललाई पुर्ण खोप सुनिश्चित महानगरपालिकाको प्रमाणपत्र प्रदान गरेका थिए । कार्यक्रममा उपस्थितहरुले जिल्लालाई पुर्ण खोप सुनिश्चित कायम राख्ने प्रतिबद्धता जनाएका थिए ।