कारबाहीमा परेका व्यवसायीहरुले बिहीबार बिहान समितिको कार्यालय घेराउ गर्दै नाराबाजी गरेका थिए । तर कृषिमन्त्री चक्रपाणि खनाल ‘बलदेव’ले भने कालिमाटीको सिन्डिकेट अन्त्य गर्ने कुरामा आफू अडिग रहेको बताएका छन् । बिहीबार दिउँसो मन्त्रालयमा भएको किसान, व्यापारी, कृषि बजार निर्देशनालय लगायतको बोर्ड बैठक पनि विनानिष्कर्ष सकिएको छ ।

कालिमाटी फलफुल तथा तरकारी बजारमा निक्कै ठूलो वेतिथि रहेको, विचौलियाहरुको बिगबिगी रहेको पाइएपछि मन्त्रालय आक्रामक रुपमा प्रस्तुत भएको हो । यसअघि कृषि राज्यमन्त्री र मन्त्रालयका कर्मचारीसहित गत सोमबार कालिमाटीको बजार अनुगमनमा गएर त्यहाँको वेथिति अन्त्य गर्न निर्देशन दिएका थिए ।

कारबाहीमा पर्नेमा थोकतर्फका फिससेडभित्रका ११ मध्ये आठ, सहकारी समूहका १५ मध्ये १४, माछाका २५ मध्ये २३, २४ टहराभित्र कार्यरत् ३० मध्ये २४, ३८ टहराभित्र कार्यरत ४३ मध्ये आठ व्यवसायी छन् ।

त्यस्तै, खुद्रा तर्फका खुद्रा बजारभित्रका ६४ मध्ये ५०, फलफूलभित्रका सबै नौ, गोदाम प्रयोजन केजतर्फका २० मध्ये १४, सटरतर्फका १७ मध्ये सातलाई पनि कारवाहीको निर्णय गरिएको छ । कालिमाटी फलफूल तथा तरकारी बजार विकास समितिअन्तर्गतकै बालाजु माछापोखरी बजारका खुद्रा (तल)का २३ मध्ये सात, खुद्रा (माथि) का १४ मध्ये तीन र सटरका १२ मध्ये ६ व्यवसायी पनि कारवाहीमा परेका छन् ।

तीन चार तहका विचौलियाका कारण किसानले उत्पादन गरेको सामान बजारसम्म आइपुग्दा धेरै महंगो हुने गरेको गुनासो बढेको छ । बिचौलियाले बजार र स्टल कब्जा गर्ने, एउटा स्टलको ठाउँ हेरी ८ देखि १० हजार मात्र बजार व्यवस्थापन समितिलाई बुझाउने र विचौलियाले २ लाखसम्म खाने गरेको अनुगमनका क्रममा पाइएको थियो ।