चितवन, ४ जेठ । कुखुराको राजधानी मानिने चितवनमा बर्डफ्लु भेटिएको छ । पुर्वीचितवनको खैरहनी नरगपालिका ९ सुर्तनीका स्थानीय राजन चौधरीले पालेको लेयर्स कुखुरामा एभियन ईन्फ्लुुएन्जा ( एच पाइभ एन वान ) भएको पुष्टि भएको हो ।

एक हजार पाँच सय कुखुरा पालेका राजनको पर्मको कुखुरा मर्न थालेपछि उनले बैशाखमा चितवनकै राष्ट्रिय पंक्षी रोग अन्वेषण प्रयोगशालामा परिक्षण गराएका थिए । त्यहाँ परिक्षण गर्दा इन्फुलुएन्जा देखिएपछि थप परिक्षणको लागी नमुना काठमाण्डौ पठाइएको थियो ।

काठमाण्डौमा परिक्षण गर्दा एभियन ईन्फ्लुुएन्जा ( एच पाइभ एन वान ) भएको प्रमाणित भएको राष्ट्रिय पंक्षी रोग अन्वेषण प्रयोगशाला चितवनका बरिष्ठ पशु चिकित्सक डा. दयाराम चापागाईले जानकारी दिए ।

चौधरीले पालेका सबै १५ सय कुुखुरा मरिसकेका छन् । त्यस्तै उनको नजिकै कुखुरा पालेको लक्ष्मण चौधरीको १ हजार कुखरा पनि मरेको छ । लक्ष्मणको फर्मको कुखुरा परिक्षणको लागि काठमाण्डौ पठाइएको तर रिर्पोट आएको छैन ।

मानव स्वास्थको लागि हानिकारक हुने भएकोले उक्त क्षेत्रलाई संक्रमण क्षेत्रको रुपमा लिएर उक्त क्षेत्र आसपासको कुखुरा , हास , अण्डाहरु आज नष्ट गरिएको जिल्ला पशु कार्यालयका प्रमुख डा डिल्लीराम सेढाईले जानकारी दिए ।

चिकित्सक सहितको प्रविधिक टोलीले उक्त क्षेत्रमा घरमा पालेको १७१ वटा कुखुरा तथा हाँस र १२६ वटा हाँस तथा टर्किको अण्डा नष्ट गरिएको छ । नष्ट गरिएको कुखरा , हासहरु मारेर खाल्डोमा गाडिएको जिल्ला पशु कार्यालयका प्रमुख डा डिल्लीराम सेढाईले जानकारी दिए ।

कुखुरा नष्ट गर्न केन्द्रिय पशु चिकित्सालय काठमाण्डौबाट र जिल्लाका चिकित्सक सहितको टोली परिचालित भएका थिए । उक्त क्षेत्रमा सुरक्षाको लागि औषधी र चुना समेत छरिएको छ ।