काठमाडौं, १४ वैशाख । सत्तारुढ नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले परिवर्तनको अनुभूति हुनेगरी बजेट ल्याउन सरकारलाई सुझाव दिनु भएको छ ।

अध्यक्ष प्रचण्डले जनताको जीवनमा परिवर्तन हुनेगरी विकास, निर्माणको काम अघि बढाउने गरी बजेट नआए मुलुकमा प्राप्त राजनीतिक परिवर्तनमा दिगोपना नआउनेतर्फ पनि सचेत गराउनुभयो ।

शुक्रबारबाट काठमाडौंमा सुरु भएको ‘१४ औं अन्तराष्ट्रिय औंद्योगिक व्यापार मेला तथा घरेलु उद्योग महोत्सव’ लाई सम्बोधन गर्दै उहाँले मुलुकलाई समृद्ध बनाउन सबैभन्दा अनुकूल समय रहेको पनि स्मरण गराउनु भयो ।

अध्यक्ष प्रचण्डले विकास, निर्माणद्धारा जनताको जीवनस्तरमा सुधार ल्याउनेगरी मुलुकमा सबै तहको सरकार निर्माण भएको पनि उल्लेख गर्नुभयो ।

अध्यक्ष दाहालले सरकार बलियो भएकाले मुलुकलाई समृद्ध बनाउन सक्षम हुने विश्वास पनि व्यक्त गर्नुभयो ।