काठमाडौं, ११ वैशाख । गत फागुन १८ गते मोरङका सनम शाक्यको हत्यापछि नेपालमा हुने सुन तस्करीमा प्रहरीका उच्च अधिकारी नै मुछिन थालेका छन्। तस्करी गरेर ल्याएको साढे ३३ किलो सुन बाटोबाटै गायब पारेको भन्दै सुन भरिया शाक्यको हत्या भएको प्रहरी अनुसन्धानमा देखिएको छ।

गृह मन्त्रालयले बनाएको छानबिन समितिले यही विषयमा महानगरीय अपराध महाशाखाका तत्कालीन प्रमुख दिवश लोहनीको सरूवा गरेको छ ।  चैत २८ गते अवकाश पाएका पूर्वडिआइजी गोविन्द निरौलालाई हिरासतमा लिएर अनुसन्धान थालेको  छ भने प्रहरी उपरीक्षक विकासराज खनाल लाई प्रहरीले आजै  मन्त्रालयबाटै नियन्त्रणमा लिएको छ ।

सनमसहित यो प्रकरणमा जोडिएका थप दुई जनाले पनि ज्यान गुमाइसकेका छन्। थाइ एयरवेजका वरिष्ठ टेक्निसियन सानु वनको विमानस्थल भित्रै दुर्घटनामा परेर मृत्यु भयो। वनको मृत्यु भएको हो कि हत्या भन्ने विषयमा अनुसन्धान जारी छ।

सुन प्रकरणकै विषयमा अनुसन्धान गर्न हिरासतमा लिइएका विमानस्थलमा कार्यरत लोडर प्रेमराज चौधरीले सिंहदरबार प्रहरी वृत्तमा आत्महत्या गरेका छन्।

तीन जनाको मृत्यु र उच्च प्रहरी अधिकृत मुछिएको यो सुन प्रकरणका दिन प्रतिदिन रहस्यमय बन्दै गएको छ ।