काठमाडौं , ४ बैशाख । ३३ किलो सुन तस्करी प्रकरणमा ‘बाजेको सेकुवा’का सञ्चालक पनि छानबिनमा तानिएका छन्।

तस्करी गिरोहमा रेस्टुरेन्टका संचालक चेतन भण्डारीको संलग्नताका प्रमाणहरु भेटिएकाले प्रहरीले अनुसन्धानको लागि हाललाई सम्पत्ति र बैंक खाता रोक्का गर्न पत्रचार गरेको छ । सुन तस्करीमा लगानी गरेको आशंका प्रहरीको छ । भण्डारी सो गिरोहका नाइके चुणामणि उप्रेती ‘गोरे’का आफन्त पर्छन् ।

भण्डारीसंगै जिल्ला प्रहरी कार्यालय मोरङले मोहन अग्रवाल, रमेश उप्रेती, नर्वदा खरेल उप्रेती, रक्षा भण्डारी, प्रयास पराजुली, रोहित आचार्य, कृष्ण बस्नेत, मोहमद उस्ताम मिया, भविन राई (भविन तामाङ), भोजराज भण्डारी, दुर्गा खरेल (उप्रेती), भीमकुमारी खरेल, सुरेन्द्र गौतम लगायतको बैंक खाता तथा सम्पती रोक्का राखेको छ।

उप्रेतीको समूहले विगत ५ वर्षयता विमानस्थलमा सेटिङ मिलाई ठूलो मात्रामा सुन तस्करी गर्दै आएको थियो। त्यसरी तस्करी हुने सुनमा सुन पसलेदेखि धेरै जनाको साझेदारी हुने गरेको थियो।

गत माघमा तस्करीको ३३ किलो सुन काठमाडौंबाट विराटनगर लैजाने क्रममा हराएपछि सुन लुकाउनेहरुसँग मिलेको आशंकामा सनम शाक्यलाई नियन्त्रणमा लिई सोही गिरोहका व्यक्तिहरुले कुरा खोल्न करेन्ट लगाएका थिए। सोही क्रममा उनको मृत्यु भएपछि चारकोशे झाँडीमा शव लुकाउन लैजाँदै गर्दा फागुन १९ गते महानगरीय प्रहरी अपराध महाशाखा, काठमाडौंबाट खटिएको टोलीले गाडिभित्रैबाट शव बरामद गरेपछि घटना सतहमा आएको थियो । हत्या गरिएका शाक्य सोही समूहमा एकाउन्टेन्टका रुपमा कार्यरत थिए।

महाशाखाको टोलीले मोहन काफ्ले, नरेन्द्र कार्की र टेकराज मल्ल ठकुरीलाई त्यसैबेला पक्राउ गरेको थियो।

हालसम्म घटनामा संलग्न २० जनालाई प्रहरीले पक्राउ गरिसकेको छ। विमानस्थलभित्र कार्यरत थाई एयरलाइन्सका ८ तथा नेपाल एयरलाइन्सका ३ जना कर्मचारीलाई प्रहरीले पक्राउ गरिसकेको छ।

त्यस्तै राप्रपा प्रजातान्त्रिकका नेता भुजुङ गुरुङ , भारतीय व्यापारी महावीर गोल्यान, बालकृष्ण श्रेष्ठ, कपिलराज पुरी, गोपालकुमार श्रेष्ठ, दोराम खत्री, सम्बिरप्रसाद तोलाङे, हेमन्त गौतम, पुण्यप्रसाद लामा, वीरेन्द्रमान श्रेष्ठ, राजन थापा, लालबहादुर मगर, राजु महर्जन पक्राउ परेका छन् । त्यस्तै आरके ज्वेलर्सका सञ्चालक राजेन्द्र शाक्य र जय मातादी गोल्ड प्यालेसका पवन अग्रवाल पनि पक्राउ परिसकेका छन्।

हत्यामा सहयोगी भूमिका खेल्ने लाक्पा शेर्पा र मदन घिमिरे समेत मोरङ प्रहरीको हिरासतमा छन्।

पक्राउ परेका उपर मोरङ प्रहरीले कर्तव्य ज्यान तथा संगठित अपराध मुद्दामा कारबाही अघि बढाएको छ।

गृह मन्त्रालयले सहसचिव ईश्वचन्द्र पौडेलको संयोजकत्वमा छानबिन समिति गठन गरी घटनाको अनुसन्धान भईरहेको छ ।

सो घटनाको अनुसन्धानमा मुख्य अभियुक्तलाई जोगाएको आरोपमा अपराध महाशाखाका एसएसपी दिवेश लोहनी, डिएसपी प्रजित केसी र सई बालकृष्ण सञ्जेललाई त्यहाँबाट हटाएर गृह मन्त्रालयले छानबिन गरिरहेको छ।