काठमाडौं २० जेष्ठ । नेकपा (एमाले) का अध्यक्ष एवं पूर्वप्रधानमन्त्री केपी शर्मा ओलीले राज्य संयन्त्रमा रहेका व्यक्ति तथा निकायहरूलाई आफ्नो अधिकारको दुरुपयोग नगर्न र संयमित रहन चेतावनी दिनुभएको छ।

बुधवार काठमाडौंमा आयोजित कार्यक्रममा बोल्दै उहाँले राज्यका जिम्मेवार पदमा रहेका व्यक्तिहरूलाई ‘उत्ताउलिएर’ अगाडि नबढ्न सचेत गराउनुभयो। समय र परिस्थिति सधैँ एउटै नहुने भन्दै उहाँले शक्तिको दुरुपयोग दीर्घकालीन रूपमा टिक्न नसक्ने टिप्पणी गर्नुभयो।

ओलीले नेपालको राजनीतिक इतिहास स्मरण गर्दै राणा शासन, पञ्चायती व्यवस्था र राजतन्त्रजस्ता शक्तिशाली प्रणालीहरू समेत ढलेको उल्लेख गर्दै वर्तमान अवस्था पनि स्थायी नहुने दाबी गर्नुभयो।

उहाँले भदौ २३ र २४ गतेका घटनालाई लिएर सरकारमाथि आलोचना गर्दै ती घटनामा भएका आगजनी र राष्ट्रिय सम्पत्ति विनाशलाई सरकारले सामान्य रूपमा लिएको आरोप लगाउनुभयो।

ओलीका अनुसार देशव्यापी रूपमा भएका यस्ता आपराधिक गतिविधिलाई गम्भीरतापूर्वक नलिइएको भन्दै सरकारको भूमिकाप्रति असन्तुष्टि व्यक्त गर्नुभयो।

राजनीतिक विश्लेषकहरूका अनुसार ओलीको यो अभिव्यक्ति वर्तमान सुरक्षा अवस्था र शासन शैलीप्रति गरिएको कडा टिप्पणीका रूपमा लिइएको छ।