काठमाडौं । काठमाडौंको थापाथलीस्थित बागमती नदी किनारमा रहेको सुकुमवासी बस्तीमा आज बिहानैदेखि सामान सार्न सुरु भएको छ । सरकारले बस्ती खाली गर्न निर्देशन दिएसँगै कतिपयले आफैं बोकेर त कतिपयले गाडीमा लोड गरेर सामान सारिरहेका हुन् ।

यसअघि, बुधबार गृहमन्त्री सुदन गुरुङले राजीनामा दिएलगत्तै प्रधानमन्त्री बालेन शाहले सुरक्षा निकायका प्रमुखलाई बोलाएर सुकुमवासी बस्ती खाली गराउन निर्देशन दिएका थिए ।

प्रधानमन्त्रीको निर्देशनपछि बिहीबार काठमाडौंका प्रमुख जिल्ला अधिकारी ईश्वरराज पौडैलको अध्यक्षतामा बसेको जिल्ला सुरक्षा समितिको बैठकले सुकुमवासी बस्ती खाली गराउने निर्णय गरेको थियो । उक्त निर्णयअनुसार नै प्रहरीले बिहीबार साँझ थापाथलीलगायत काठमाडौंका ४ वटा सुकुमवासी बस्तीमा माइकिङ गरेको थियो ।

बागमती नदी किनारका सुकुमवासी बस्ती खाली गराउन सरकारले बारम्बार प्रयास गरेपनि सफल भएको थिएन । तर, यसपटक प्रधानमन्त्री शाहले कडा निर्देशन दिएकाले बस्ती खाली हुने सम्भावना बढेको छ ।

यता, सामान सार्न सुरु गरेपनि कतिपयले भने सरकारको निर्णय अवज्ञा गर्ने योजना अनुसार बस्ती खाली नगर्न आग्रह गरिरहेका छन् । सामान सार्न नमान्नेहरूले भने सरकारको निर्णयप्रति आक्रोश व्यक्त गर्दै प्रतिकार गर्ने बताएका छन् ।

सुकुमवासी बस्ती खाली गराउने सरकारको यो निर्णयलाई कतिपयले स्वागत गरेका छन् भने कतिपयले भने विरोध गरेका छन् । सुकुमवासीहरूको व्यवस्थापन नगरी बस्ती खाली गराउन नहुने उनीहरूको माग छ ।