काठमाडौं, ४ वैशाख। सञ्चार तथा सूचना प्रविधिमन्त्री बिक्रम तिमिल्सिना ले काभ्रेको पनौती–५ स्थित सुरक्षण मुद्रण केन्द्र को निरीक्षण गर्दै सवारी चालक अनुमतिपत्र (लाइसेन्स) छपाइ प्रक्रियालाई तीव्र बनाउन निर्देशन दिएका छन्।

निरीक्षणका क्रममा मन्त्री तिमिल्सिनाले ट्रायल पास गरी राजस्व तिरेपछि २४ घण्टाभित्रै लाइसेन्स छाप्ने नयाँ व्यवस्था आजदेखि लागू गरिएको जानकारी दिए। उनले लामो समयदेखि लाइसेन्स नपाउने समस्या अन्त्य गर्ने सरकारको प्रतिबद्धता दोहोर्याउँदै बाँकी सबै लाइसेन्स आगामी असार मसान्तभित्र छापिसक्ने लक्ष्य रहेको बताए।

“अब सम्भव काम रोकिने छैन, सेवाग्राहीले छिटो सेवा पाउनेछन्। लाइसेन्स नपाउने समस्या अन्त्य हुन्छ,” मन्त्री तिमिल्सिनाले भने।

उनले सुरक्षण मुद्रण केन्द्र लाई प्रभावकारी र सक्षम संस्थाका रूपमा विकास गर्नुपर्नेमा जोड दिँदै विगतमा देखिएका व्यवस्थापन र इच्छाशक्तिको अभाव अब हटाइने बताए। अर्बौं रकम खर्चेर खरिद गरिएका उपकरण लामो समय प्रयोगविहीन रहेकोमा चिन्ता व्यक्त गर्दै ती उपकरण पूर्ण रूपमा सञ्चालनमा ल्याइने उनको भनाइ छ।

मन्त्रीले नागरिकको डाटा सुरक्षा प्राथमिकतामा राख्न र सेवाग्राहीमैत्री सेवा प्रवाह सुनिश्चित गर्न निर्देशन दिएका छन्। साथै सेवा प्रवाहमा देखिएका गुनासाहरू छिटो समाधान गर्ने प्रतिबद्धता समेत व्यक्त गरे।

उनले देशभर इन्टरनेट र मोबाइल सेवाको पहुँच तथा गुणस्तर सुधारलाई पनि प्राथमिकतामा राखिएको उल्लेख गर्दै आगामी एक वर्षभित्र सबै नागरिकलाई प्रविधिको पहुँचमा ल्याउने लक्ष्य रहेको बताए।

केन्द्रका कार्यकारी निर्देशक देवराज ढुंगानाका अनुसार संस्थालाई दीर्घकालीन रूपमा सुदृढ बनाउन योजना तयार भइरहेको छ। भविष्यमा यही केन्द्रबाट राहदानी, चेकबुक, स्मार्टकार्ड, हुलाक टिकट र अन्तःशुल्क स्टिकरजस्ता महत्वपूर्ण कागजात छाप्ने क्षमता विकास गरिएको छ।

हाल सुरक्षण मुद्रण केन्द्र ले दैनिक करिब ४० हजार लाइसेन्स छापिरहेको छ। वैशाख १२ गतेभित्र १२ लाख लाइसेन्स छाप्ने र बाँकी १७ लाख लाइसेन्स असार मसान्तसम्म सक्ने लक्ष्य लिइएको केन्द्रले जनाएको छ।