काठमाडौं, २१ चैत्र । इरानको दक्षिणी प्रान्त कोहगिलुयेह–बोयेरअहमदका डेपुटी गभर्नरले इरानद्वारा खसालिएको अमेरिकी एफ-१५ लडाकु विमानका बेपत्ता पाइलटको खोजी कार्य तीव्र रुपमा भइरहेको जनाएका छन् ।

यस्तै अर्कोतर्फ अमेरिकाले पनि आफ्ना लडाकु विमान र हेलिकप्टर प्रयोग गरेर पाइलटको खोजीमा व्यापक प्रयास गरिरहेको छ। इरानको सरकारी समाचार एजेन्सी फार्सका अनुसार, डेपुटी गभर्नरले प्रहरी, सुरक्षा बल र स्थानीय बासिन्दाहरू पाइलटको पहिचान गर्न र उनलाई नियन्त्रणमा लिन सक्रियताका साथ लागिपरेको जानकारी दिएका छन्। उनले स्थानीय बासिन्दाहरूलाई बेपत्ता पाइलटका बारेमा कुनै पनि जानकारी प्राप्त भएमा तुरुन्त अधिकारीहरूलाई सम्पर्क गर्न अपिल समेत गरेका छन्।विमान ठ्याक्कै कुन स्थानमा खस्यो भन्ने कुरा अझै स्पष्ट भइसकेको छैन।

तर, इरानी सरकारी सञ्चारमाध्यमहरूले कोहगिलुयेह-बोयेरअहमद र खुजेस्तान प्रान्तको नामलाई प्राथमिकताका साथ उल्लेख गरिरहेका छन्।गत शुक्रबार इरानको दक्षिणी क्षेत्रमा अमेरिकी एफ-१५ लडाकु विमान खसालिएको खबर सार्वजनिक भएको थियो। बीबीसीको अमेरिकी साझेदार सीबीएस न्यूजले दुईवटा स्रोतलाई उद्धृत गर्दै उक्त घटनाको पुष्टि गरेको छ। स्रोतका अनुसार खसालिएको विमानका चालक दलका एक सदस्यको भने उद्धार गरिसकिएको छ।