काठमाडौं, १८ चैत्र । पूर्वगृहमन्त्री तथा कांग्रेस नेता रमेश लेखकले गृहमन्त्रीसँग गोली चलाउन आदेश दिने अधिकार नभएको बयान दिएका छन् । बुधबारदेखि उनको बयान सुरु भएको छ । प्रहरी हिरासतमा रहेका लेखकलाई बयानका लागि प्रहरी परिसर काठमाडौं लगिएको थियो ।

महाराजगन्जस्थित नेपाल प्रहरीको दुई नम्बर गणबाट बयानका लागि परिसर लगिएका लेखकले भदौ २३ मा गोली चलाउने आदेश आफूले नदिएको बताएका छन् ।

बयानमा सहभागी एक अधिकारीका अनुसार लेखकले गोली हान्न आदेश दिने अधिकार गृहमन्त्रीसँग नरहेको उल्लेख गरेका छन् ।

भदौ २३ गते भएको जेनजी आन्दोलनमा प्रदर्शनकारीलाई दमन गरेको आरोपमा जाँचबुझ आयोगको प्रतिवेदनमा सिफारिस भएअनुसार प्रहरीले उनलाई चैत १४ गते पक्राउ गरेको थियो ।
लेखकलगत्तै पूर्वप्रधानमन्त्री एवम् एमाले अध्यक्ष केपी शर्मा ओली पनि पक्राउ परेका थिए ।

स्रोतले दिएको जानकारीअनुसार लेखकले बुँदागतरुपमा बयान दिएका छन् ।

१। भाद्र २३ र २४ को घटनाका सन्दर्भमा गृहमन्त्रीले प्रशासन र सुरक्षा निकायबाट उपलब्ध हुने सूचनाको आधारमा निर्देशन दिने र समन्वय गर्नेमात्रै हो ।

२। गृहमन्त्रीलाई कुनै पनि कानुनले बल प्रयोग सम्बन्धमा निर्देशन दिने अधिकार प्रदान दिएको छैन । मैले कुनै आदेश दिएको पनि छैन । मेरो क्षेत्राधिकारीभित्र पनि पर्दैन ।

३। सम्भावित अवस्थाको निर्क्योल गरी निर्णय लिने जिम्मेवारी स्थानीय प्रशासन सम्बन्धी ऐन तथा अन्य कानुनअनुसार सुरक्षा निकाय र स्थानीय स्तरमा तोकिएका पदाधिकारीलाई अधिकार दिएको छ ।

४। गृहमन्त्रीले आफ्नो मन्त्रालयसँग सम्बन्धित नीतिगत र कानून निर्माणको नेतृत्व गर्ने र निर्देशन दिने हो ।