काठमाडौं । प्रधानमन्त्री बालेन्द्र शाह (बालेन) ले प्रदेशगत रूपमा प्रत्यक्ष निर्वाचित सांसदहरूसँग छलफल गरिरहेका छन् । सोमबार कोशी र कर्णाली प्रदेशका सांसदसँग छलफल गरेका प्रधानमन्त्रीले आज सुदूरपश्चिम प्रदेशका सांसदहरूसँग छलफल गरेका छन् ।

एमाले सांसद ऐनबहादुर महरसहितका एमाले सांसदहरूले आफ्ना पार्टी अध्यक्ष केपी शर्मा ओलीको रिहाइको माग गरेका थिए । तर प्रधानमन्त्रीले यस विषयमा कुनै प्रतिक्रिया नदिएको एक सांसदले अनलाइनखबरलाई बताए ।

एमाले सांसद महरले कर्मचारीतन्त्रका कारण सबै खत्तम भएको भन्दै यसमा सुधार गर्न प्रधानमन्त्रीलाई आग्रह गरेका थिए । त्यसमा प्रधानमन्त्री बालेनको जवाफ थियो, “यसको जड नै तपाईंहरू हो । कांग्रेस र एमालेले नै यसबाट सुधार सुरु गर्नुस् ।”

त्यसबाहेक गेटा अस्पताल निर्माणको विषय उठाउँदा प्रधानमन्त्रीले आफू यसको विकासका लागि तयार रहेको बताएका थिए । बालेनले भने, “गेटाको विषयमा अहिले हस्ताक्षर गर्नुपरे पनि तयार छु । कहिले गरौं ?”

सांसदहरूले सेती लोकमार्गको विषयमा पनि चासो राखेका थिए । उनीहरूले कैलाली–खक्रौला नाकादेखि चीनको सिमाना ताक्लाकोटसम्मको सडक निर्माणको काम अघि बढाउन सुझाव दिएका थिए । यसबारे प्रधानमन्त्रीले सकारात्मक चासो राखेको ती सांसदले जानकारी दिए ।