काठमाडौं, २९ फागुन। राष्ट्रिय स्वतन्त्र पार्टीका वरिष्ठ नेता बालेन साहले नेकपा एमालेका अध्यक्ष केपी शर्मा ओलीका बुवाप्रति श्रद्धाञ्जलि अर्पण गरेका छन्।

बालेनले शुक्रबार साँझ समाजिक सञ्जालमार्फत ओलीका बुवा मोहनप्रसाद ओलीप्रति श्रद्धाञ्जलि अर्पण गरेका हुन्। उनले पूर्वप्रधानमन्त्री ओलीप्रति समवेदनासमेत प्रकट गरेका छन्।

उनले केही समयअघि आफैंले पनि बुवा गुमाएको स्मरण गर्दै बुवाको अनुपस्थितिले जीवनमा कति ठूलो रित्तोपन र अपूरणीय अभाव ल्याउँछ भन्ने अनुभव आफूले महसुस गरेको उल्लेख गरेका छन्।

उनले लेखेका छन्, ‘केही समयअघि मात्रै पिता गुमाएकाले मलाई महसुस छ– पिताको अनुपस्थितिले जिन्दगीमा कति रित्तोपन ल्याउँछ, कस्तो अपूरणीय अभाव ल्याउँछ। पूर्वप्रधानमन्त्री केपी शर्मा ओली ज्यूलाई पर्न गएको पितृशोकमा हार्दिक समवेदना व्यक्त गर्दछु। पिताजीप्रति हार्दिक श्रद्धाञ्जलि, वैकुण्ठवास होस्।’