काठमाडौं, २५ फागुन । फागुन २१ गते सम्पन्न प्रतिनिधिसभा निर्वाचनको अन्तिम परिणाम सार्वजनिक भएसँगै सामाजिक सञ्जालमा चर्चित तथा ‘भाइरल’ उम्मेदवारहरूको वास्तविक जनमत कति छ भन्ने पनि स्पष्ट भएको छ।

निर्वाचनमा धेरै नयाँ अनुहार संसद् पुगे पनि सामाजिक सञ्जालमा अत्यधिक चर्चित केही उम्मेदवार भने मतदाताबाट विश्वास प्राप्त गर्न असफल भएका छन्। धेरैले त जमानतसमेत जोगाउन सकेनन्।

यस निर्वाचनमा राष्ट्रिय स्वतन्त्र पार्टी (रास्वपा) ले १६१ निर्वाचन क्षेत्रमध्ये १२४ सिट जित्दै ऐतिहासिक सफलता हासिल गरेको छ। तर सामाजिक सञ्जालमा चर्चित विभिन्न उम्मेदवारहरू भने मतदाताबाट अपेक्षित समर्थन पाउन सकेनन्।

ऋषि धमला ६५५ मतमै सीमित

पत्रकार ऋषि धमला रौतहट–४ बाट प्रभु साह नेतृत्वको जनमत पार्टीको तर्फबाट चुनाव लड्नुभएको थियो। चुनावी अभियानका क्रममा उहाँ कहिले जेरी बनाउँदै, कहिले चटपटे पकाउँदै र कहिले ट्याक्टर चलाउँदै सामाजिक सञ्जालमा निकै भाइरल बन्नुभएको थियो।

तर परिणाम भने फरक आयो। उक्त क्षेत्रमा गणेश पौडेल (रास्वपा) ले ३६ हजार ८७६ मत प्राप्त गर्दै विजयी हुँदा धमलाले मात्र ६५५ मत पाउनुभयो।

दिवाकर साहलाई ३९८ मत

पत्रकारिता र सामाजिक विषयमा सक्रिय रहँदै चर्चामा आएका दिवाकर साह ले धनुषा–३ बाट स्वतन्त्र उम्मेदवारी दिनुभएको थियो।

उक्त क्षेत्रमा मनिष झा (रास्वपा) ले ४३ हजार ९८८ मत ल्याएर विजयी हुँदा दिवाकर साह भने ३९८ मतमै सीमित हुनुभयो। उहाँले निर्वाचनपछि पुनः पत्रकारितामा फर्किएको बताउनुभएको छ।

अभिनेत्री निशा अधिकारी ९१ मत

३० भन्दा बढी नेपाली चलचित्रमा अभिनय गरेर चर्चित अभिनेत्री निशा अधिकारी ले काठमाडौं–५ बाट उम्मेदवारी दिनुभएको थियो।

उक्त क्षेत्रमा सस्मित पोखरेल ले ३० हजार ७३७ मत प्राप्त गरेर जित हासिल गर्दा निशा अधिकारीले ९१ मत मात्र पाउनुभयो।

युवराज संग्रौला ३०५ मत

वरिष्ठ अधिवक्ता तथा कानुनविद् युवराज संग्रौला ले झापा–२ बाट स्वतन्त्र उम्मेदवारी दिनुभएको थियो।

तर उक्त क्षेत्रमा इन्दिरा राना मगर (रास्वपा) ले ६० हजार ११० मत ल्याएर जित हासिल गर्दा संग्रौलाले ३०५ मत मात्र प्राप्त गर्नुभयो।

अन्य चर्चित उम्मेदवार पनि पराजित

सामाजिक सञ्जालमा चर्चित हेमराज थापा बाजुराबाट रास्वपाको उम्मेदवार हुनुहुन्थ्यो। उहाँले ६ हजार ३५ मत पाएर तेस्रो स्थानमा रहनुभयो। उक्त क्षेत्रमा जनकराज गिरी (नेपाली कांग्रेस) १७ हजार १७३ मतसहित विजयी हुनुभयो।

त्यस्तै, झापा–२ बाट चुनाव लड्नुभएका भद्रप्रसाद नेपाल (स्वागत नेपाल) ले ३ हजार ९६५ मत प्राप्त गर्नुभयो।

काठमाडौं–१ बाट उम्मेदवारी दिनुभएका उद्यमी समीरमान सिंह बस्नेत (पठाओ सञ्चालक) भने मात्र ५० मत पाएर नवौं स्थानमा सीमित हुनुभयो। उक्त क्षेत्रमा रञ्जु न्यौपाने (रास्वपा) ले १५ हजार ४५५ मत ल्याएर जित हासिल गर्नुभयो।

सामाजिक सञ्जालको लोकप्रियता ≠ चुनावी जित

यसपटकको परिणामले सामाजिक सञ्जालमा लोकप्रिय हुनु र मतदाताबाट विश्वास प्राप्त गर्नु फरक कुरा भएको स्पष्ट देखाएको छ।

फेसबुक, युट्युब वा टिकटकमा चर्चित भएका धेरै उम्मेदवारहरूलाई मतदाताले संसदसम्म पुर्‍याउन तयार देखिएनन्। विश्लेषकहरूका अनुसार वास्तविक जनसम्पर्क, संगठन र स्थानीय राजनीतिक आधारबिना चुनाव जित्न कठिन हुने सन्देश यस निर्वाचनले दिएको छ।