काठमाडौं। नेकपा (एमाले) निकट राष्ट्रिय युवा संघ नेपालका अध्यक्ष क्षितिज थेबेले राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र शाह (बालेन)लाई लिम्पियाधुरा, कालापानी र लिपुलेक जस्ता संवेदनशील राष्ट्रिय मुद्दामा स्पष्ट र आधिकारिक धारणा सार्वजनिक गर्न चुनौती दिएका छन्।

शुक्रबार काठमाडौंमा आयोजित राष्ट्रिय युवा परिषद्को प्रथम बैठकलाई सम्बोधन गर्दै थेबेले बालेनतर्फ संकेत गर्दै ती भूभागबारे स्पष्ट वक्तव्य दिन आग्रह गरे। उनले प्रश्न गरे,
“हुनेवाला प्रधानमन्त्रीज्यू, लिपुलेक र लिम्पियाधुराबारे तपाईंको स्टेटमेन्ट के हो? हामीले लिम्पियाधुरा, कालापानी र लिपुलेकलाई नेपालको नक्सामा समावेश गरेका छौँ कि छैनौँ? अब तपाईंको धारणा सार्वजनिक हुनुपर्छ।”

थेबेले आगामी आम निर्वाचनपछिको राजनीतिक दिशाबारे पनि टिप्पणी गर्दै, नेपाली समाजलाई सुखी र समृद्धिको आधार दिन सक्ने नीति र दृष्टिकोण प्रस्तुत गर्नुपर्ने समय आएको बताए।

उनले नयाँ भनिएका राजनीतिक दलहरूसँग ठोस नीति, दृष्टिकोण र एजेन्डाको अभाव रहेको आरोप लगाउँदै भने,
“नयाँ दलहरूसँग एजेन्डा छैन। एजेन्डा भएको भए आम सञ्चारमाध्यमले बहसका लागि बोलाउँदा किन नआउने? एजेन्डा भए पो बहसमा आउनु।”

एमाले नेतृत्वमा भएका उपलब्धिहरूको चर्चा गर्दै थेबेले ऊर्जा, शिक्षा र सुशासन क्षेत्रमा परिवर्तन आएको दाबी गरे।
“हिजो राणा कालमा ६ प्रतिशतले मात्रै बिजुली पाएका थिए। आज हामीले ९८ प्रतिशत नागरिकलाई विद्युतको पहुँचमा पुर्‍याएका छौँ,” उनले भने, “सबै सार्वजनिक विद्यालयमा आईटी विकास गरिएको छ। भ्रष्टाचारप्रति शून्य सहनशीलताको नीति लिएर हामी अगाडि बढिरहेका छौँ।”

थेबेले राष्ट्रिय सार्वभौमिकता र भौगोलिक अखण्डताका विषयमा स्पष्ट, सुसंगत र जिम्मेवार धारणा आवश्यक पर्ने उल्लेख गर्दै, लोकप्रिय नाराभन्दा राष्ट्रिय हितमा आधारित नीतिगत स्पष्टता चाहिने बताए।

उनको अभिव्यक्तिलाई राष्ट्रिय मुद्दामा नयाँ दल र नेताहरूको भूमिकामाथि प्रश्न उठाउने राजनीतिक सन्देशका रूपमा हेरिएको छ। अब बालेन वा रास्वपाबाट उक्त विषयमा कस्तो प्रतिक्रिया आउँछ भन्नेमा राजनीतिक वृत्तको चासो बढेको छ।