नयाँ दिल्ली, १२ माघ । भारतले आज आफ्नो ७७औँ गणतन्त्र दिवस भव्य रूपमा मनाउँदैछ। सन् १९५० जनवरी २६ मा संविधान लागू भएको ऐतिहासिक दिनको सम्झनामा आज नयाँ दिल्लीस्थित कर्तव्य पथमा भारतले आफ्नो विकास यात्रा, सांस्कृतिक विविधता र सैन्य शक्तिको प्रदर्शन गर्न लागेको हो।
राष्ट्रपति द्रौपदी मुर्मुको नेतृत्वमा हुने यो समारोह बिहान १०:३० बजे सुरु भई करिब ९० मिनेटसम्म चल्नेछ। यस वर्षको गणतन्त्र दिवसको मुख्य विषय ‘वन्दे मातरम् को १५० वर्ष’ राखिएको छ।

समारोहमा युरोपेली काउन्सिलका अध्यक्ष एन्टोनियो लुइस सान्तोस दा कोस्टा र युरोपेली आयोगकी अध्यक्ष उर्सुला भोन डेर लेयेन मुख्य अतिथिका रूपमा सहभागी हुँदैछन्। परेडमा भर्खरै गठन गरिएका सैन्य एकाइहरूका साथै अपरेसन सिन्दूर मा तैनाथ गरिएका अत्याधुनिक हतियार प्रणालीका मोडेलहरू पनि देखाइनेछ।

परेड सुरु हुनुअघि करिब १०० जना कलाकारले ‘विविधतामा एकता’ थिममा सांस्कृतिक प्रस्तुति दिने कार्यक्रम छ। भारतले यस अवसरमा आफ्नो सैन्य कौशल मात्र नभई अन्तर्राष्ट्रिय सम्बन्ध र सांस्कृतिक विरासतलाई पनि विश्वसामु प्रस्तुत गर्ने तयारी गरेको छ।