काठमाडौं, माघ ४ । नेकपा (एमाले) ले आगामी फागुन २१ गते हुने प्रतिनिधिसभा निर्वाचनका लागि देशभरका सबै १ सय ६५ निर्वाचन क्षेत्रमा प्रत्यक्षतर्फका उम्मेदवार टुंगो लगाएको छ । यसपटक एमालेले ५४ भन्दा बढी नयाँ अनुहारलाई उम्मेदवार बनाउँदै पुस्तान्तरण र युवामुखी नेतृत्वलाई प्राथमिकता दिएको सन्देश दिएको छ ।

पार्टीले सार्वजनिक गरेको अन्तिम सूचीअनुसार यसअघि संसदीय प्रतिस्पर्धामा नआएका, संगठनमा खारिएका र स्थानीयस्तरमा पहिचान बनाइसकेका नयाँ नेताहरूलाई व्यापक रूपमा अघि सारिएको छ । नयाँ उम्मेदवारमध्ये उल्लेख्य संख्यामा युवा र महिला पनि रहेका छन् ।

एमाले नेतृत्वका अनुसार नयाँ अनुहारलाई अवसर दिनु केवल उम्मेदवार फेरबदल होइन, पार्टीभित्र पुस्तान्तरणलाई संस्थागत गर्ने रणनीतिक निर्णय हो । यसबाट दीर्घकालीन नेतृत्व विकास, संगठन सुदृढीकरण र जनतासँगको सम्बन्ध मजबुत बनाउने अपेक्षा गरिएको छ ।

अनुभव र निरन्तरतासँगै परिवर्तनको सन्तुलन मिलाएर उम्मेदवार छनोट गरिएको दाबी एमालेको छ । अनुभवी नेतासँगै नयाँ उम्मेदवारलाई मैदानमा उतारेर चुनावी अभियानलाई थप ऊर्जाशील बनाउने विश्वास पार्टीले व्यक्त गरेको छ ।

एमालेले सबै उम्मेदवारलाई एकताबद्ध भएर चुनावी अभियानमा होमिन निर्देशन दिएको छ । पार्टीले सुशासन, स्थायित्व र विकासलाई मुख्य एजेन्डाका रूपमा अघि सार्दै जनविश्वास जित्ने रणनीति लिएको जनाएको छ ।

उम्मेदवार छनोट प्रक्रिया पूरा भएसँगै एमालेले सुदूरपश्चिमदेखि पूर्वसम्म देशव्यापी चुनावी अभियान तीव्र बनाउने तयारी गरेको छ ।

एमालेका ५४ नयाँ अनुहार (निर्वाचन क्षेत्रसहित)