काठमाडौं, २ साउन । ब्राजिलका राष्ट्रपति लुइज इनासियो लुला दा सिल्भाले डोनाल्ड ट्रम्प विश्वको सम्राट नभएर अमेरिकाको एक निर्वाचित नेता मात्रै भएको टिप्पणी गरेका छन् ।

सिल्भाले ट्रम्पको भन्सार कर लगाउने धम्कीको जवाफ दिँदै यस्तो बताएको सीएनएनले जनाएको छ ।

गत हप्ता ट्रम्पले ब्राजिललाई अगस्ट १ देखि ५० प्रतिशत भन्सार कर लगाउने धम्की दिएका थिए । ट्रम्पले यो असाधारण भन्सार करको धम्कीलाई ब्राजिलका दक्षिणपन्थी पूर्वराष्ट्रपति जेयर बोल्सोनारोविरुद्धको ब्राजिलमा चल्दै गरेको मुद्दासँग जोडेका थिए ।

ट्रम्पका नजिकका सहयोगी बोल्सोनारो २०२२ मा लुलाको राष्ट्रपति जितपछि उनलाई सत्ताच्युत गर्ने प्रयास गरेको आरोपमा ब्राजिलमा मुद्दा खेपिरहेका छन् । उनलाई सत्तापलटको योजनाकारको रूपमा ठहर गरियो भने उनले लामो समय जेल सजाय भोग्नुपर्ने बताइएको छ ।

बिहीबार सीएनएनकी क्रिश्चियन अमानपुरसँग विशेष कुराकानी गर्दै, लुला दा सिल्भाले ट्रम्पको धम्कीले प्रोटोकल तोडेको र उनको पूर्ववर्ती जेयर बोल्सोनारोको भाग्य दुईदेशबीचको व्यापार वार्ताको हिस्सा हुन नसक्ने तर्क गरे ।

“ब्राजिलको न्यायिक शक्ति स्वतन्त्र छ । गणतन्त्रको राष्ट्रपतिलाई कुनै प्रभाव हुँदैन,” उनले भने,” बोल्सोनारोलाई व्यक्तिगत रूपमा मुद्दा लगाइएको होइन । सत्तापलटका लागि गरेका प्रयासहरूका आधारमा उनलाई मुद्दा लगाइएको हो ।” बोल्सोनारोले गल्ती अस्वीकार गर्दै आएका छन् ।

लुलाले ट्रम्पले जनवरी ६ को विद्रोहको समयमा गरेका कार्यहरू ब्राजिलमा गरेका भए उनलाई पनि ब्राजिलमा मुद्दा चलिरहेको हुने बताए ।

“यदि, ट्रम्प ब्राजिलियन भएको भए र उनले क्यापिटल हिलमा भएको घटना यहाँ गरेका भए उनलाई पनि ब्राजिलमा मुद्दा चलिरहेको हुनेथियो,” उनले भने, “सम्भवतः उनले संविधान उल्लंघन गरेको हुन्थे । यदि, उनले ब्राजिलमा त्यस्तो गरेका भए उनलाई पनि पक्राउ गरिएको हुन्थ्यो ।” सीएनएन