काठमाडौ २० असार । एक युवकलाई खुकुरी प्रहार गरेको घटनामा संलग्न रहेका व्यक्तिहरूलाई धरान प्रहरीले एक हप्तापछि पक्राउ गरी सार्वजनिक गरेको छ।

इलाका प्रहरी कार्यालय धरानले घटनामा संलग्नहरूको पहिचान गरी तीनजनालाई नियन्त्रणमा लिएको हो।

गत शुक्रबार धरानमा तीन जनाको समूहले धारिलो हतियारसहित एक युवकमाथि आक्रमण गरेको भिडिओ सामाजिक सञ्जालमा सार्वजनिक भएको थियो। सार्वजनिक भएको भिडिओमा मोटरसाइकलमा आएका तीन जनाले एक युवकलाई लखेट्दै खुकुरी पार गरेको र ती युवकको ढाडमा रगत बगेको दृश्य सहितको भिडियो भाइरल भएको थियो।

त्यही भिडियोको आधारमा प्रहरीले अनुसन्धानलाई अघि बढाएको जनाएको छ। शुक्रबार बिहान पत्रकार सम्मेलन गर्दै पक्राउ पर्नेहरूको नाम प्रहरीले सार्वजनिक गरेको हो।

इलाका प्रहरी कार्यालय धरानका डीएसपी प्रकाश जबेगुले घटना पुरानो रिसिबीका कारण भएको अनुसन्धानको क्रममा खुल्न आएको जानकारी दिए।

तीनजनाको समूहले धरान उपमहानगरपालिका २० बस्ने समिर राईलाई लखेटी लखेटी खुकुरीले काटेको समेत खुल्न आएको डीएसपी जवेगुले जानकारी दिए।

घटनामा संलग्न रहेको आरोपमा प्रहरीले धरान उपमहानगरपालिका ११ घर भएका २१ वर्षीय प्रशान्त प्रधान, सोही ठाउँका पासाङ शेर्पा र मोटरसाइकल चालक सप्तरीको कञ्चनरूप नगरपालिका घर भई धरानमा बस्ने साइमन चौधरीलाई पक्राउ गरेर सार्वजनिक गरेको हो।

उनीहरु सवार मोटरसाइकल भने अर्कैको रहेको प्रहरी अनुसन्धानबाट खुलेको छ।

साइमनले चलाएको मोटरसाइकल उनका काका देवनारायण चौधरीको भएको अनुसन्धानको क्रममा खुलेकोसमेत डीएसपी जबेगुले बताए।

पक्रकार सम्मेलनमा डीएसपी ले धरानमा पछिल्लो समय खुकुरी प्रहारका घटनामा कमी आएको दाबी गरेका छन्। पछिल्लो घटनाको सन्दर्भमा उनले प्रहरीमा सूचना ढिलो आएको सताए।

गत वर्ष धरानमा खुकुरी प्रहारका ३१ वटा घटना भएका थिए। यस वर्ष त्यस्ता घटना ११ वटा भएका छन्।

आजको पत्रकार सम्मेलन मार्फत प्रहरीले अन्य दुईजनालाई पनि सार्वजनिक गरेको छ। सार्वजनिक भएकाहरू एकजना बालिकामाथि यौन दुर्व्यवहार गरेको आरोपमा पक्राउ परेका व्यक्ति हुन् भने अर्का व्यक्ति चोरीमा संलग्न रहेको डीएसपी जगेबुले बताए।