पोखरा १० जेठ । नेकपा माओवादी केन्द्रका तथा पूर्व प्रधानमन्त्री अध्यक्ष पुष्पकमल दाहाल प्रचण्डले समाजवादी क्रान्तिको आधार तयार पार्ने प्रक्रियामा आफुहरु रहेको बताएका छन् । पुष्पलाल लोकमार्ग जनजागरण अभियानअन्तर्गत शनिबार कास्कीमा आयोजित जनसम्वाद कार्यक्रममा प्रचण्डले हुलाकी मार्ग र पुष्पलाल लोकमार्गमा माओवादीले चलाएको अभियान कार्यनीतिक कुरामात्रै नभएर समाजवादी क्रान्तिको आधार तयार पार्नका लागि चालिएको भिजन भएको बताए ।

उनले नयाँ क्रान्तिको माध्यमबाट मुलुकमा राजनीतिक स्थायीत्व र भ्रष्टाचारको अन्त्य गर्दै आर्थिक समृद्धि कायम गर्ने मुख्य जिम्मेवारी माओवादीको भएको जिकिर गरे । प्रचण्डले अहिले मुलुक माओवादीमय हुँदै गएको उल्लेख गर्दै आगामी निर्वाचनमा माओवादी पहिलो पार्टी हुने दावी गरे । माओवादी पहिलो पार्टी भए समाजवादको आधार निर्माण हुने उनको भनाइ छ ।

प्रचण्डले माओवादीले पहिलेदेखि नै प्रत्यक्ष निर्वाचित कार्यकारी राष्ट्रपतिय व्यवस्था हुनुपर्छ भन्ने आएकाले अब जनताको सहमतिमा संविधान संशोधन गरी उक्त व्यवस्था ल्याउनुपर्ने बताए ।
जेठ २ देखि मध्यपहाडी लोकमार्गको पश्चिम विन्दु वैतडीको पाटनबाट शुरु भएको प्रचण्डको लोकमार्ग केन्द्रित पहिलो चरणको कार्यक्रम आजै समापन भएको प्रचण्डको सचिवालयले जनाएको छ ।

यस क्रममा बैतडी, डडेलधुरा, डोटी, अछाम, दैलेख, जाजरकोट पूर्वी रुकुम, पश्चिम रुकुम, रोल्पा बागलुंग पर्वत हुँदै कास्की जिल्लामा प्रचण्डले सभा, जनसम्वाद र भेटघाट सम्पन्न गरेका छन् । प्रचण्ड पोखराको कार्यक्रम सम्पन्न गरी आजै काठमाडौं फर्केका छन् ।