काठमाडौं, ६ जेठ । नेपाल राष्ट्र बैंकका नवनियुक्त गभर्नर विश्वनाथ पौडेलले वित्तीय क्षेत्रको स्थिरता आफ्नो प्राथमिकतामा रहने बताएका छन् ।
मन्त्रिपरिषद्को मंगलबार बसेको बैठकले १८ औं गभर्नरमा नियुक्त गरेपछि प्रतिक्रिया दिँदै पौडेलले राष्ट्र बैंकलाई सही दिशामा अगाडि बढाउनका लागि सुपरिवेक्षणलाई थप प्रभावकारी बनाउने बताएका हुन् । धेरै नियम कानून नल्याई सुपरिवेक्षणमा बढी केन्द्रित हुने उनको भनाइ छ ।
‘मेरो मुख्य लक्ष्य नेपाल राष्ट्र बैंकलाई सही दिशामा अघि बढाउनु हो । यसका लागि म सुपरिवेक्षणलाई थप प्रभावकारी बनाउन र वित्तीय क्षेत्रको स्थिरता सुनिश्चित गर्न प्राथमिकता दिनेछु,’ पौडेलले भने । प्रधानमन्त्री केपी ओली र नेपाली कांग्रेसका सभापति शेरबहादुर देउवाबीच मंगलबार बिहान पौडेललाई गभर्नर बनाउने सहमति भएको थियो ।यसै सहमतिपछि अर्थमन्त्री विष्णु पौडेल संयोजकत्वको सिफारिस समितिले पौडेलसहित तीन जनाको नाम गभर्नरका लागि सिफारिस गरेको थियो । कामु गभर्नर नीलम ढुंगाना र पूर्वसचिव दिनेश भट्टराईसँगै पहिलो नम्बरमा सिफारिस भएका पौडेललाई मंगलबार साँझ बसेको मन्त्रिपरिषद्ले गभर्नरमा नियुक्त गरेको हो । गभर्नर पौडेल सरकारको वित्त नीतिको मातहतमा मौद्रिक नीति ल्याउनुपर्ने पक्षमा छन् ।पौडेलले युनिभर्सिटी अफ क्यालिफोर्नियाबाट कृषि तथा प्राकृतिक स्रोत अर्थशास्त्रमा विद्यावारिधि गरेका छन् । राष्ट्रिय योजना आयोगको उपाध्यक्ष भइसकेका पौडेलले काठमाडौं विश्वविद्यालयमा प्राध्यापकका रूपमा पनि काम गरिसकेका छन् ।