काठमाडौ २६ बैशाख । भारतीय विदेश मन्त्रालयका सचिव विक्रम मिस्रीले पहलगाम आक्रमणपछि सिर्जित परिस्थितिलाई थप चर्काउने मनसाय नरहेको बताएका छन् ।

शुक्रबार अपराह्न भएको प्रेस बिफिङमा बोल्दै उनले भारतले सुरुवाती हमलाको जवाफ मात्र फर्काएको बताए । ‘हाम्रो जवाफ लक्षित, सटिक, संयमित र सन्तुलित रहेको छ, हाम्रो निशानामा सैन्य अखडा परेका छैनन्’, उनले भने, ‘केवल पाकिस्तानमा रहेका आतंकवादी पूर्वाधारमाथि निशाना साँधिएको छ ।’

दुई साताअघि भारत प्रशासित जम्मु कश्मिरको पहलगाममा एक नेपाली र २६ भारतीय नागरिकको ज्यान लिने गरी आतंकवादी हमला भएको थियो । त्यसको जिम्मेवारी ‘द रेसिसटेन्स फ्रन्ट’ नामक धार्मिक कट्टरपन्थी समूहले लिएको थियो ।

‘यो समूह पाकिस्तानमा रहेको चिरपरिचित आतंकवादी समूह लश्कर ए तोइबाको एक मोर्चा हो भन्ने प्रसंग मैले हिजो पनि कोट्याएको थिएँ’, उनले अगाडि भने, ‘हामी चाँडै नै अनुगमन टोलीसँग फेरि भेट्दैछौं र यसअघि हामीले उपलब्ध गराएको जानकारीमा नयाँ कुराहरु समेट्दै साझा गर्नेछौं ।’

पहलगाम घटनाको जवाफ भन्दै भारतले तीन दिनअघि पाकिस्तानका ९ स्थानमा हवाई कारबाही गरेको थियो । त्यसपछि भारत र पाकिस्तानबीच तनाव बढ्दो क्रममा छ ।

प्रेस ब्रिफिङमा मिस्रीले सीमापारबाट धेरै निराधार जानकारीहरु बाहिर ल्याएको भन्दै भनेका छन्, ‘मैले हिजोकै कुरालाई आंशिक रुपमा दोहो¥याएँ मलाई लाग्छ पाकिस्तानको छवि एउटा विश्वव्यापी आतंकवादको केन्द्रबिन्दु रहेको भन्ने कुराको कैयौं उदाहरण रहेका छन्, जसबारे ठोस प्रमाणहरु भारतमा मात्र नभइ विश्वभरका सरकार, अधिकारी र निकायसँग उपलब्ध छन् ।’

पाकिस्तानले दशकौंदेखि भारतमा सीमापार आतंकवादलाई उदण्डका साथ पछ्याउँदै आएको भन्दै उनले पाकिस्तानले अन्तर्राष्ट्रिय समुदायलाई जानाजान भ्रमित पार्न खोजेको समेत टिप्पणी गरेका छन् ।