काठमाडौं, २३ वैशाख । पाकिस्तानमा दक्षिण एसियाली कलाकारहरुको एक महिना लामो आवासीय प्रदर्शनी शुरु भएको छ । पाकिस्तान नेशनल काउन्सिल अफ आट्र्सले आयोजना गरेको प्रदर्शनीमा नेपाल र माल्दिभ्सका कलाकारहरू सहभागी छन् ।

उनीहरुले पाकिस्तानका विभिन्न स्थानमा एक महिना लामो सांस्कृतिक सिर्जनाहरु प्रस्तुत गर्नेछन् । हिजो राजधानी इस्लामाबादमा भएको प्रदर्शनीको औपचारिक उद्घाटन समारोहमा पाकिस्तानका लागि नेपाली राजदूत रिता धिताललगायत फिलिपिन्स, माल्दिभ्सका राजदूतहरु उपस्थित थिए । त्यसैगरी चिनियाँ दूतावासका सांस्कृतिक सहचारीलगायत पाकिस्तानी विदेश मन्त्रालयका अधिकारीहरुको उपस्थिति रहेको बताइन्छ ।

उनीहरुले लाहोर, तटीय शहर कराँची र उत्तरी स्कार्दुमा आफ्ना सिर्जना प्रस्तुत गर्दैछन् । सहभागी नेपाली कलाकार विधाता केसीले भनिन्, ‘सबैभन्दा अद्भूत अनुभवहरूमध्ये पाकिस्तान मेरो लागि सँधै प्रेरणाको स्रोत बनेको छ । पाकिस्तान कलात्मक सम्पदाले समृद्ध छ । सौन्दर्यरुपी कलाले मलाई निकै उत्प्रेरित गरिरहेको छ ।’ कार्यक्रममा अन्य कलाकारले पनि आफ्ना धारणा राखेका थिए ।

दक्षिण एसियाली कलाकार आवासाीय कार्यक्रम नेपालस्थित पाकिस्तानी दूतावास, माल्दिभ्सस्थित पाकिस्तान उच्चायोग र पाकिस्तानको परराष्ट्र मन्त्रालयको सहकार्यमा आयोजना गरिएको हो ।