काठमाडौं ११ बैशाख । लोकतन्त्र दिवसलाई जनताले जितेको दिनका रूपमा एमालेले काठमाडौँको भृकुटीमण्डपमा आज दिउँसो १ बजेबाट ‘युथ सेलिब्रेसन’ गर्दै छ।

देशभरबाट ४० वर्ष मुनिका युवाको सहभागिता गराइने कार्यक्रमको सम्पूर्ण तयारी पूरा भइसकेको युवा परिचालनको जिम्मा पाएका राष्ट्रिय युवा ससंघ नेपालका अध्यक्ष क्षितिज थेबेले जानकारी दिए।

कार्यक्रममा सहभागी हुन देशभरका युवाहरूआएको र जनताले जितेको ऐतिहासिक दिनलाई नेपाली युवाले सेलिब्रेशन गर्नुपर्छ भन्ने मान्यतासहित यो कार्यक्रम गर्न लागेको उनको भनाइ छ।

कार्यक्रममा एमालेका ४० वर्ष मुनिका युवाहरूको सहभागिता हुने र देशभरबाट एकलाख युवाले सहभागिता जनाउने एमालेको दाबी छ।

कार्यक्रममा एमालेका अध्यक्ष प्रधानमन्त्री केपी शर्मा ओली र महासचिव शंकर पोखरेलले संक्षिप्त मन्तव्य राख्ने कार्यक्रम छ।

कार्यक्रम स्थलमा कन्सर्ट, विभिन्न नाचगानका साथै सांस्कृतिक झाँकी प्रदर्शन हुने छन्। त्यस्तै कफिसप, फुडसपहरू तथा युवाले उत्पादन गरेका सामानहरूको स्टल समेत कार्यक्रममा राखिने भएको छ।