काठमाडौं, ६ चैत । नेकपा एमालेको भातृ संगठन अनेरास्ववियु पुनर्गठन गरिने भएको छ । संगठनकी अध्यक्ष नवीना लामा सांसद भएपछि पार्टीले अनेरास्ववियुमा नयाँ नेतृत्व चयनको तयारी सुरु गरेको छ।

नयाँ नेतृत्व चयनकै लागि बुधबार संगठनको पदाधिकारीक बैठक बोलाइएको छ।

अनेरास्ववियुका उपाध्यक्ष तथा महासचिवले अध्यक्षको दाबी गरिरहेका छन्। उपाध्यक्षहरु सुनिता बराल, महेश बर्तौला, शैलेश लामा र रश्मी आचार्य तथा महासचिव ऐन महरले अध्यक्षका लागि लबिङ सुरु गरेका छन्। केही सचिवहरुले पनि नेतृत्वमा दाबी गरेका छन्।

अध्यक्ष चयनका लागि समय भए पनि पार्टी एकीकरण अघि बढिसकेकाले एमालेले भातृ संगठनको अधिवेशन नगर्ने निर्णय गरिसकेको छ। जसकारण तत्कालका लागि पार्टीले नै अनेरास्ववियुमा नयाँ नेतृत्व चयन गर्नेछ।

नयाँ नेतृत्व चयनमा सहमति भएलगत्तै आफूले राजीनामा दिने अध्यक्ष लामाले बताएकी छिन्।