काठमाडौं १७ फागुन । नेपाल प्रहरीले लागूऔषधविरुद्धको महाअभियान शुरु गरेको छ । लागू औषधको प्रयोग र कारोबार दुवै बढिरहेकोले यसलाई नियन्त्रणका लागि प्रहरीले महाअभियान शुरु गरेको हो ।

महाअभियानको शुभारम्भ गर्दै गृहमन्त्री रमेश लेखकले नेपाललाई लागुपदार्थ मुक्त देशको रूपमा स्थापित गर्न सबै एकजुट भएर काम गर्नुपर्ने बताउनुभयो । उहाँले यो समस्या समाधानको लागि नागरिकसँग नजिक रहेको पालिका सरकारले बढी पहल गर्नुपर्ने बताउनुभयो । पालिका र वडा—वडा स्तरबाट लागूऔषधविरुद्धको महाअभियान सञ्चालन गर्नुपर्नेमा उहाँको जोड छ ।

यस्तै प्रहरी महानिरीक्षक वसन्तबहादुर कुँवरले लागूऔषध नियन्त्रण र रोकथाम कुनै एकमात्र निकायबाट सम्भव नरहेको बताउनुभयो । लागूऔषध नियन्त्रणका लागि व्यक्ति, समाज, विभिन्न पेशाकर्मी, राजनीतिक व्यक्तित्व, समाजसेवी, अभिभावक, स्थानीय निकाय, समाज र सरोकारवालासमेतको संयुक्त सहकार्य अपरिहार्य रहेको उहाँको भनाइ छ ।

प्रहरीको तथ्याङ्क अनुसार लागूऔषध प्रयोग तथा कारोबारसम्बन्धी देशभर दर्ता भएका मुद्दाहरु हरेक आर्थिक वर्षमा झन्डै ७ प्रतिशतको हाराहारीमा बढिरहेको पाइन्छ । गाडी दुर्घटना, लुटपाट, चोरी, साइबर अपराध, आत्महत्या, यौनजन्य घटनाको कारणमा लागूऔषध एउटा मुख्य कारकका रूपमा रहेको पनि प्रहरी महानिरीक्षक कुँवरले बताउनुभयो ।