काठमाडौं, ४ चैत । सुनसरीको साविकको मधुवन ९ अर्थात हालको बराहक्षेत्र नगरपालिका–११ इक्राही बस्तीमा गएराति भएको भिषण आगलागीबाट हाल सम्म एक करोड ३६ लाख ६० हजारको क्षति भएको छ भने २ सय ३५ घरपरिवार पुर्ण रुपमा विस्थापित भएका छन् ।

आगलागिमा ८५ घर जलेको छ । क्षतिको पुर्ण विवरण आउन अझै वाँकी नै छ । बराह नगरपालिकाका मेयर निलम खनालका अनुसार आगलागिमा परेर २ जना गंभीर घाइते भएका छन् । स्थानीय प्रभु सररदार र अर्का एक जना घाइते भएका छन् । घाइतेको विराटनगर स्थित नोवेल अस्पतालमा उपचार भैरहेको छ ।

गएराती ९ वजे स्थानीयको घरमा घुर बालेको आगो सल्किएर आगलागी भएको मेयर खनालले वताए । आगलागीमा बस्ती नै सखाप भएको छ । केही बालबालिका पनि सामान्य घाइते भएको जनाइएको छ ।

राती आगलागि भएपछि इटहरी, धरान, इनरुवा र राजविराजबाट गएको चार बारुणयन्त्र तथा नेपाली सेना, सशस्त्र प्रहरी र जनपथ प्रहरी एवं स्थानीयवासीको सक्रियतामा राति १ बजेतिर आगोलाई पूर्ण नियन्त्रणमा लिइएको जिल्ला प्रहरी कार्यालय सुनसरीका प्रहरी नायब उपरीक्षक नारायणप्रसाद चिमोरियाले जानकारी दिए ।

बराह नगरपालिकाले आगलागि पीडितको विजोग भएकाले यथासक्य सहयोग गर्न समेत अपील गरेको छ । आगलागीमा परेर स्थानीयवासी सबैको घरमा भएका खाद्यान्न, लत्ताकपडा, बहुमूल्य सुनचाँदी, भाडावर्तनलगायत सबै नै खरानी भएकाले उनीहरुका लागि आपत्कालीन सबै प्रकारका राहतको आवश्यकता रहेको नपाले जनाएको छ ।

तत्कालिन रुपमा नपाले कम्वल र खाद्यन्न वितरण गरेको जनाइएको छ । आगलागि पीडितहरु खुल्ला आकास मुनी वस्न वाध्य भएका छन् । रेडक्रस , लगायत अन्य सामाजिक संघ सस्थाहरुले समेत तत्कालिन राहत वितरण घट्ना स्थलमा नै पुगेर वितरण गरेका छन् ।