काठमाडौं १४ माघ । चिनिया एआई डिपसिकको आविस्कारका कारण अमेरिकी बजारमा सोमबार भारी गिरावट आएको छ। प्रिमार्केट कारोबारले अमेरिकी बजारमा ठूलो गिरावटको संकेत देखाएको न्यूयोर्क टाइम्सले उल्लेख गरेको छ । विशेष गरी कृत्रिम बुद्धिमत्तामा (एआई) आधारित व्यवसायमा अग्रस्थानमा रहेका कम्पनीहरूलाई सबैभन्दा धेरै असर परेको छ।चिनियाँ एआई कम्पनी डीपसिकले उच्चस्तरी च्याटबोटहरूको क्षमता निकै कम लागतका चिप प्रयोग गरेर सफलता हासिल गरेको खुलासा भएपछि अमेरिकी आइटी उद्योथमा तरंग ल्याएको छ। चिनिया पछिल्लो आविस्काकारका कारण प्रमुख चिप निर्माता एनभिडिया जस्ता कम्पनीहरूको उच्च मूल्याङ्कनमा लगानीकर्ताहरूको अपेक्षालाई पुनर्विचार गर्न बाध्य पारेको छ।

गुगल, मेटा, र ओपनएआई जस्ता कम्पनीहरूले आफ्नो एआई व्यवसाय निर्माण गर्न गरिरहेका ठूला लगानीको प्रभावलाई लिएर पनि बजारमा चिन्ता बढेको अमेरिकी समाचार माध्यमहरुले प्रमुखताका साथ उठाइरहेका छन् ।

एसएन्डपी ५०० को फ्युचर्स २ प्रतिशतभन्दा बढीले घटेको छ भने नास्डाक झन्डै ४ प्रतिशतले घटेको छ।
युरोप र जापानका बजारमा पनि प्राविधिक स्टकले दबाब सिर्जना गरेको बताइएको छ ।

प्रमुख कम्पनीहरूमा गिरावट

एनभिडियाः प्रिमार्केट कारोबारमा ५ प्रतिशतभन्दा बढीले यसमा गिरावट आएको छ । १०० अर्ब डलर भन्दा बढी बजार मूल्य गुमाउन पुगेको छ । एएमडी र एएसएमएल जस्ता अन्य चिप निर्माताहरूमा पनि ठूलो गिरावट देखिएको छ।
मेटाः ३ प्रतिशतभन्दा बढीले घटेको छ ।
माइक्रोसफ्टः झन्डै ५ प्रतिशतको गिरावट आएको छ ।
ओराकलः ८ प्रतिशतभन्दा बढीले घटेको छ ।
सफ्टबैंकः बहुराष्ट्रिय यस इन्भेष्टमेन्ट कम्पनीको टोकियो बजारमा ८ प्रतिशतभन्दा बढी गिरावट देखिएको छ ।
चिनियाँ प्रतिस्पर्धा र अमेरिकी प्रतिक्रिया
डीपसिक को प्रगतिले विश्वव्यापी एआई प्रतिस्पर्धा बढ्दै गएको सङ्केत प्रष्टै देखिएको छ । यसै क्रममा, राष्ट्रपति ट्रम्पले अमेरिकी एआई उत्पादनलाई तीव्र बनाउन सवै खाले ूअवरोधहरू हटाउनेू कार्यकारी आदेशमा हस्ताक्षर गरेका छन्।

अमेरिकी सरकारले एनभिडिया जस्ता शक्तिशाली चिपहरू चीनलाई बिक्री गर्न रोक लगाउने चेतावनी दिंदै आएको छ ।

बर्नस्टिनका विश्लेषकहरूले डीपसिक को प्रगतिप्रति गहिरो चिन्ता नभएको बताएका छन्। एआई प्रणालीहरूको क्षमता बढे पनि चिपहरूको मागमा कमी नआउने भन्दै उनीहरुले अझै धेरै चिपहरूको आवश्यकता परिरहने दावी गरेका छन् ।

प्राविधिक क्षेत्रमा बढ्दो प्रतिस्पर्धा, विशेष गरी चिनियाँ एआई कम्पनीहरूको प्रगतिले अमेरिकी बजारमा गहिरो प्रभाव पारिरहेको छ। प्रमुख कम्पनीहरूको आगामी त्रैमासिक नाफाको प्रतिवेदनको पर्खाइमा लगानीकर्ताहरूको चासोसँगै प्रश्नहरू उठाइरहेको वाशिंगटन पोष्टले उल्लेख गरेको छ ।