काठमाडौं ६ माघ । उगृहमन्त्री रमेश लेखकले विदेशी लगानी भित्र्याउन र देशभित्रै पनि लगानीको वातावरण बनाउन अध्यादेश ल्याइएको बताएका छन् । उनले उद्योगी व्यवसायीहरूले लामो समयदेखि माग गर्दै आएको विषय समेटेर लगानीको वातावरण बनाउन अहिलेको अध्यादेश आएको बताए ।

‘अध्यादेश नराम्रो छ भनेर कहीँ कतैबाट कुरा आएको छैन, उद्योगी व्यवसायीहरुले धन्यवाद नै दिएका छन्,’ आइतबार महेन्द्रनगरमा आयोजित पत्रकार सम्मेलनमा मन्त्री लेखकले भने, ‘सदन आह्वान गर्ने बेला अध्यादेश आयो भनेर मात्रै विमति देखिएको हो, सरकार छिट्टै सदन बोलाउने तयारीमा छ, सदन चलेको पहिलो दिनमै अध्यादेश प्रस्तुत हुन्छ ।’

मन्त्री लेखकले वर्तमान सत्ता गठबन्धनमा कुनै समस्या नरहेको समेत बताए । उनले नेपाली कांग्रेस र नेकपा एमालेबीच भएको ७ बुँदे सहमतिअनुसार गठबन्धन अगाडि बढ्ने बताए । ‘अहिलेको गठबन्धनमा कुनै जटिलता छैन, बाहिर विभिन्न हल्ला सुनिन्छन्, त्यसमा कुनै सत्यता छैन,’ उनले भने, ‘सात बुँदे सहमति कार्यान्वयन गर्नमै हामी केन्द्रित छौं ।’ अहिलेको सरकार सुशासन, विकास र समृद्धिका लागि बनेकाले त्यहीअनुसार अगाडि बढिरहेको उनले बताए ।

मन्त्री लेखकले २०८४ सम्म अहिलेको गठबन्धन चल्ने बताए । उनले अहिलेको १८ महिना एमाले अध्यक्ष केपी ओली प्रधानमन्त्री हुने र त्यसपछिको १८ महिना कांग्रेस सभापति शेरबहादुर देउवा प्रधानमन्त्री हुने बताए ।

महाकाली नदीमा निर्माणाधीन पक्की पुलको निरीक्षणका क्रममा भौतिक पूर्वाधार तथा यातायातमन्त्री देवेन्द्र दाहालसँगै गृहजिल्ला आइपुगेका लेखकले शनिबार पुल निर्माणस्थलसँगै मझगाउँ विमानस्थलको पनि निरीक्षण गरेका थिए । पक्की पुल र गाइडबन्ड सुख्खा बन्दरगाहका लागि समेत महत्त्वपूर्ण भएकाले यसमा विशेष ध्यान दिएर बर्खाअगावै निर्माण सम्पन्न गर्नुपर्ने उनले बताए ।

गृहमन्त्री लेखकले १५ महिनादेखि प्यालिस्टिनी समूह हमासको नियन्त्रणमा रहेका कञ्चनपुरका विपिन जोशीको रिहाइका लागि पनि सरकारले गम्भीर ढंगले पहल गरिरहेको बताए । अहिलेको युद्धविरामकै बेला विपिनको रिहाइ गराउन सरकार गम्भीर ढंगले लागेको बताए । नेपाल सरकारलाई प्राप्त जानकारीअनुसार विपिन अहिलेसम्म सकुशल रहेको उनले बताए ।