काठमाडौं २१ पुस । पूर्व उपराष्ट्रपति नन्दकिशोर पुनले सक्रिय राजनीतिमा आफ्नो उपस्थितिलाई औपचारिकता दिलाएका छन् । माओवादीको पदाधिकारी, स्थायी समिति हुँदै केन्द्रीय समितिका बैठकसम्ममा उनी देखिन थालेका हुन् ।
काठमाडौंमा जारी केन्द्रीय समितिको पहिलो दिन आइतबार उनी बैठकमा सहभागी भए । यसअघि पदाधिकारी र स्थायी समिति बैठकमा पनि उनी सहभागी हुने गरेका थिए ।
नन्दकिशोर पुन नेपालको दोस्रो र तेस्रो उपराष्ट्रपति हुन् । ७ वर्ष उपराष्ट्रपतिको भूमिका निर्वाह गरेका नन्दकिशोर पार्टी राजनीतिमा प्रष्ट देखिन थालेका हुन् ।
माओवादीका नेताहरूका अनुसार उनकै चाहना अनुसार पार्टीले भूमिका दिलाउन लागेको हो ।
आइतबारको केन्द्रीय समिति बैठकमा पासाङले आफ्ना कुरा केही राखेनन् । बैठकमा उद्घोषणको जिम्मेवारी महासचिव देव गुरुङलाई दिइएको थियो ।
अध्यक्ष प्रचण्डले राजनीतिक प्रतिवेदन प्रस्तुत गर्नुअघि उनले मञ्चमा रहेका नेताहरूलाई सम्बोधन गर्दै औपचारिक आशन ग्रहण गराएका थिए ।
सो क्रममा पुनलाई ‘पूर्वउपराष्ट्रपति’ सम्बोधन गर्दै महासचिव गुरुङले आशन ग्रहण गराए । बैठकमा सहभागी एक केन्द्रीय सदस्य भन्छन्, ‘उहाँ ९नन्दकिशोर पुन० आजको बैठकमा सहभागी हुनुभयो । मञ्चमा महासचिवज्यूले पूर्वउपराष्ट्रपति भनेर सम्बोधन गर्नुभएको थियो ।’
बैठकमा पुनलाई अध्यक्ष प्रचण्ड बसेकै लहरमा बस्ने व्यवस्था मिलाइएको थियो । उनी बसेको ठाउँअघि ‘उपाध्यक्ष’ लेखिएको नेमप्लेट राखिएको थियो ।
माओवादीकै नेताहरू प्रचण्डले नेतृत्वमा अन्य नेताहरूले देखाएको चासो व्यवस्थापन गर्नका लागि पनि पुनलाई अघि सार्न खोजेको स्वीकार गर्छन् । ‘अध्यक्ष कमरेडले पदाधिकारीमा फ्यानहरू बढाउन पनि खोज्नुभएको होला,’ एक नेताले भने ।
प्रचण्डको देब्रेतिर सुरुमा उपाध्यक्ष कृष्णबहादुर महरा र त्यसपछि पुन बसेका थिए ।
हाल २१ सदस्यीय माओवादी केन्द्रको पदाधिकारीमा वरिष्ठ उपाध्यक्ष नारायणकाजी श्रेष्ठ छन् भने उपाध्यक्षत्रय छन्– कृष्णबहादुर महरा, अग्नि सापकोटा र पम्फा भुसाल ।
महासचिवमा देव गुरुङ छन् भने उपमहासचिवमा वर्षमान पुन, जनार्दन शर्मा, गिरिराजमणि पोखरेल, शक्ति बस्नेत, मात्रिका यादव र हरिबोल गजुरेल छन् ।
विगतमा जुनसुकै पृष्ठभूमिबाट आए पनि उपराष्ट्रपतिजस्ता राष्ट्रको सर्वोच्च अनि सर्वमान्य ओहदामा बसिसकेका व्यक्तिहरू नै फटाफट दलप्रति उत्तरदायी हुँदै पद दाबी गर्दै आउने अभ्यासलाई राजनीतिक वत्ताहरूले अनौठो र अनुपयुक्त भनी विश्लेषण गर्दै आएका छन् ।
प्रतिक्रिया दिनुहोस्