काठमाडौं २५ मंसिर ।  गृहमन्त्री रमेश लेखकले वर्तमान गठवन्धन सरकारको मुख्य एजेण्डा भनेको भ्रष्टाचारमुक्त र सुशासनसहितको राष्ट्र निर्माण रहेको बताउनुभएको छ । मङ्गलबार सुर्खेतको वीरेन्द्रनगरमा नेपाल प्रेस युनियन सुर्खेतले आयोजना गरेको पत्रकार सम्मेलनमा उहाँले सो कुरा बताउनुभएको हो ।

संविधानको रक्षा, सङ्घीय लोकातान्त्रिक गणतन्त्रको सबलीकरण गरी देशमा राजनीतिक स्थायित्वका लागि एमाले–कांग्रेस गठवन्धन बनेको गृहमन्त्री लेखकले बताउनुभयो ।

पूर्व उपप्रधानमन्त्री तथा गृहमन्त्री रवि लामिछानेका विषयमा बोल्नुहुँदै मन्त्री लेखकले अपराधमा संलग्न भएको आरोप लागेका व्यक्ति माथि अनुसन्धान हुँदा मानवअधिकारको हनन् नहुने बताउनुभयो ।

लेखकले सरकार मानवअधिकार रक्षाका लागि प्रतिवद्ध रहेको उल्लेख गर्नुहुँदै सार्वजनिक रुपमा लामिछाने माथि लागेको आरोपको अनुसन्धान हुनुलाई मानव अधिकारसँग जोड्न नहुने उल्लेख गर्नुभयो । अनुसन्धान, अदालत र न्यायिक निरुपणलाई प्रभावित गर्ने कार्य गलत रहेको उल्लेख गर्दै सरकारले कसैको पनि मानवअधिकारको हनन् गर्ने कार्य नगरेको मन्त्री लेखकले दावी गर्नुभयो ।

अनुसन्धान र न्यायिक प्रक्रिया कानुन सम्वत अघि बढ्ने उल्लेख गर्नुहुँदै मन्त्री लेखकले भिडले न्यायको निरुपण नुहने बताउनुभयो । सरकार र मन्त्रि परिवर्तनको विषय हल्ला मात्रै भएको मन्त्री लेखकको भनाइ छ ।

यस्तै, गृहमन्त्री लेखकले लुम्बिनी प्रदेशमा रहेका कर्णालीका महत्त्वपूर्ण प्रहरी संरचनाहरु यथासिघ्र सार्न लागिएको बताउनुभयो । जग्गा प्राप्ति लगायतका विषय टुङ्गो लागि सकेकाले कर्णाली बाहिर रहेका महत्त्वपूर्ण प्रहरी कार्यालयहरु कर्णालीमा सार्ने तयारी रहेको मन्त्री लेखकले बताउनुभयो ।

कर्णालीमा शान्ति सुरक्षाका विषयमा चुनौती नभए पनि परम्परागत हिंसा भने चुनौतीका रुपमा रेहेको उहाँले बताउनुभयो । लागूऔषध, आत्महत्या र घरेलु हिंसा कर्णालीमा चुनौतीका रुपमा देखा परेको उल्लेख गर्दै यसको निरुपणमा सरकारले नयाँ ढङ्गले सुरक्षा योजना तयार पार्ने मन्त्री लेखकको दावी थियो ।