काठमाडौं १२ मंसिर । नेकपा एमालेका उपमहासचिव एवं पूर्वपरराष्ट्रमन्त्री प्रदीप ज्ञवालीले चीनसँगको बेल्ट एन्ड रोड इनिसिएटिभ बीआरआई परियोजनालाई गिजोल्ने काम गर्न नहुने बताएका छन्।

प्रधानमन्त्री केपी शर्मा ओलीको चीन भ्रमणको पूर्वसन्ध्यामा सो परियोजनाको कार्यान्वयन ढाँचाबारे सत्तारुढ दल कांग्रेस र एमालेबीच नै फरक धारणा आइरहेका बेला उनले त्यसलाई गिजोल्ने गरी विवादमा तान्न नहुने बताएका हुन्।

बुधबार काठमाडौँमा आयोजित एक कार्यक्रममा उपमहासचिव ज्ञवालीले सो परियोजना चीनसँगको द्विपक्षीय सम्बन्धको मामिला भएकाले त्यसमा अन्य राष्ट्रले चासो लिनु उचित नभएको टिप्पणी गरे।

उनले नेपालले कुनै पनि देशको अहित नचाहने भएकाले अन्य देशले पनि नेपालको आन्तरिक मामिलामा चासो लिन नहुने स्पष्ट पारे।

उपमहासचिव ज्ञवालीले भने, ‘हामीले लिने नीतिहरूले अरू छिमेकी वा अन्य देशको आधारभूत हितलाई चुनौती खडा नगरुन्जेल अरूले चासो राख्नु उचित पनि होइन। र, चासो राख्नुभयो भने सरी यो हाम्रो द्विपक्षीय मामिला हो है, तपाईंहरूले नेपाललाई विश्वास गर्नुस्, हामीले हाम्रा भूमि तपाईंहरूका विरुद्ध प्रयोग हुन दिँदैनौँ, हाम्रा कुनै पनि पोलिसीले तपाईंहरूलाई अफ्ठ्यारो पर्न दिँदैनौँ। हामी कुनै गठबन्धनमा जोडिएर तपाईंहरूको हितलाई प्रतिकूल प्रभाव पार्दैनौँ। हामी हाम्रो राष्ट्रिय हितलाई ध्यानमा राखेर अगाडि बढ्ने हो। यसमा कृपया हामीलाई विश्वास गर्नुहोस्, हामीलाई डिल गर्न दिनूस् भनेर नै जानुपर्ने हुन्छ।’

आन्तरिक मामिलामा विवादित हुने र आफै गिजोल्दै जाने हो भने अरूहरूको सरोकार त्यति नै बढ्दै जाने चिन्ता पनि उनले व्यक्त गरे।