काठमाडौं, २४ फागुन । प्रधानमन्त्री केपी शर्मा ओलीले अबको पाँच वर्षमा असाधारण विकास गर्ने दाबी गर्दै देशमा कसैले पनि भोकै मर्ने अवस्था नआउने बताएका छन् ।

प्रधानमन्त्री ओलीले अबको समय देश विकास गर्ने भएको भन्दै पाँच वर्ष सरकारले क्यालेन्डर बनाएरै काम गर्ने बताए।

नेपाल उद्योग वाणिज्य महासंघले आयोजना गरेको सातौँ अन्तर्राष्ट्रिय व्यापार मेलामा बोल्दै ओलीले भने, ‘दियर विल वी नो बेगर इन नेपाल’। सरकारले सबैको जिम्मा लिन्छ। उनले विकासका आयोजना शिलान्यास मात्र हुने प्रवृतिको अन्त्य गर्ने बताउँदै भ्रष्टाचार विरुद्धमा पनि निर्मम भएर लाग्‍ने बताए।

ओलीले सरकारले उत्पादन वृद्धि र रोजगारीको अवसर सिर्जना पूर्ण इफोर्ट लगाउले बताए।

कार्यक्रममा उद्योग वाणिज्य तथा आपूर्तिमन्त्री मातृका यादव पनि आक्रामक रुपमा प्रस्तुत भएका छन् ।

यादवले सरकारले भ्रष्ट ठेकेदार र कर्मचारी कसैलाई पनि नछोड्ने बताए। ‘नेता मन्त्री बनेपछि औषधि गर्न विदेश जान्छन्, कर्मचारी असुली गर्न जान्छन्, तस्करहरु कर्मचारीलाई घुस खुवाउन जान्छन् अब यस्ता धन्दा चल्दैनन्,’ यादवले भने।

पाँच वर्षमा देशलाई नमुना बनाउने दाबी गर्दै यादवले गलत काममा लाग्नेलाई कडा भन्दा कडा कारबाही गरिने बताए ।

उनले भने, ‘ अब प्रष्ट भए हुन्छ, घुस खुवाउनेको काम अब हुँदैन। घुस खानेको त के–के हुन्छ, हेर्दै जानुस्।’

फागुन २४ देखि २८ गते सम्म चल्ने सातौँ अन्तर्राष्ट्रिय व्यापार मेलामा नेपाल भारत, चिन र बंगलादेशका ३ सय भन्दा बढी कम्पनीहरुको स्टल रहने छ। मेलामा हस्तकला, पर्यटन, सूचना प्रविधि, उर्जा, भवन निर्माण सम्बन्धी, सवारीसाधन लगायतका विभिन्न स्टलहरु रहेका छन्।