विराटनगर । विराटनगरमा ट्रकको ठक्करबाट साइकलयात्री वृद्धको मृत्यु भएपछि तनावग्रस्त बनेको छ । दुर्घटनापछि आक्रोशित स्थानीयले विराटनगर – १८ आइसीपी रोडमा ढुङ्गामुढासहित प्रदर्शन गरेका छन् ।
प्रहरीले स्थिति नियन्त्रणमा लिन १० राउन्ड अश्रु ग्यास प्रहार गरिएको मोरङ प्रहरीका डीएसपी बेद जोशीले बताए ।
बिहीबार बेलुका झण्डै ७ बजे ना ४ ख २४८३ नम्बरको ट्रकले साइकलयात्री विराटनगर १८ का अन्दाजी ६० वर्षीय श्याम साहलाई ठक्कर दिएको थियो । उपचारका लागि विराट नर्सिङहोम पुर्याएलगत्तै साहको मृत्यु भएको थियो ।
सडक साँघुरो हुँदा दुर्घटना बढेको भन्दै करिब ५ सयको संख्यामा भेला भएका स्थानीयले सडकको स्तरोन्नति हुनुपर्ने, मालवाहक सवारीसाधनको गति सीमित गर्नुपर्ने, रात्रिकालीन बत्तीको व्यवस्था हुनुपर्ने लगायतका माग राखेका छन् ।
प्रहरीले ट्रक चालक सुनसरीको बर्जु गाउँपालिका ५ का ३० वर्षीय दिपक यादवलाई नियन्त्रणमा लिएको छ ।
प्रतिक्रिया दिनुहोस्