काठमाडौं ३ असोज , लेबनानमा सञ्चार उपकरण पेजर र वाकी–टकी विस्फोट भएर ३७ जनाको मृत्यु र सयौँ घाइते भएपछि राजधानी बेरुतको राफिक हरिरी विमानस्थलबाट उड्ने सबै उडानमा ती उपकरण बोक्न प्रतिबन्ध लगाइएको छ।

बेरुतमा अवस्थित यो एयरपोर्ट लेबनानको एक मात्र व्यावसायिक एयरपोर्ट हो।

लेबनानको सरकारी समाचार एजेन्सी एनएनएले उड्डयन एजेन्सीलाई उद्धृत गर्दै यात्रुहरूलाई आफ्नो साथमा पेजर वा वाकी–टकीजस्ता उपकरण नल्याउन भनिएको छ।

त्यस्ता उपकरण फेला परेमा तुरुन्तै जफत गरिने जनाइएको छ।
यसैबीच लेबनानका स्वास्थ्यमन्त्री फिरास अबेदले बुधबार देशमा सञ्चार उपकरण वाकी–टकी विस्फोट हुँदा मृत्यु हुनेको संख्या २५ पुगेको बताएका छन्।

बिहीबार पत्रकार सम्मेलनलाई सम्बोधन गर्दै स्वास्थ्यमन्त्री अबेदले विस्फोटमा घाइते हुनेको संख्या कम्तीमा ६०८ पुगेको बताए।

मंगलबार र बुधबार दुवै दिन भएका बम विस्फोटमा मृत्यु हुनेको संख्या ३७ पुगेको छ, जसमध्ये मंगलबार भएको पेजर विस्फोटमा १२ जनाको मृत्यु भएको थियो।

लेबनानका स्वास्थ्यमन्त्री फिरास अबेदले आफ्नो देशले यस विषयमा संयुक्त राष्ट्र सुरक्षा परिषद्को बैठक बोलाएको बताएका छन्। लेबनानले यस मुद्दामा अर्थपूर्ण वार्ता हुने आशा राखेको बीबीसीले जनाएको छ।