संविधान अनुसार प्रतिनिधिसभामा कुनै एकदलको बहुमत नपुगे नियुक्त भएको तीस दिनभित्र संसदमा विश्वासको मत लिनु पर्ने व्यवस्था छ। संसदमा सरकारको पक्षमा अहिले एमाले र माओवादी दुइवटा दलको मात्रै सहज बहुमत रहेको छ। राष्ट्रपतिले एमाले र माओवादी अध्यक्षको सिफारिशमा बाम गठबन्धनका नेता ओलीलाई गत फागुन ३ गते प्रधानमन्त्री नियुक्त गर्नुभएको थियो ।

एक महिनाको समय चैत ३ गते पुग्ने भएपनि प्रधानमन्त्री ओलीले फागुन २७ मा बिश्वासको मत लिने जानकारी गराउनु भएको हो । सहज बहुमत रहेपनि दुई तिहाई बहुमतका साथ सरकार सञ्चालन गर्न प्रधानमन्त्री ओली र माओवादी अध्यक्ष पुष्पकमल दाहाल, प्रचण्डले संघीय समाजवादी फोरमलाई समेत सरकारमा ल्याउन कसरत गरिरहनु भएको छ ।

फोरमसँगको अधिकांश बिषय मिलेपन हैसियत भन्दा बढी मन्त्रालय खोजेपछि कुरा मिल्न सकेको छैन । निर्वाचनमा प्रदेश २ मा सवैभन्दा ठुलो दल बनेको फोरमलाई सरकारमा सहभागी गराई सवै प्रदेशको सरकारलाई केन्द्रसँग समन्वय गरी समृद्धिको खाका अघि बढाउने प्रधानमन्त्री ओलीको योजना छ ।