काठमाडौं । सिन्धुलीमाढीस्थित गौमती नमुना माध्यामिक विद्यालय तथा क्याम्पसको बृहत्तर विकासका लागि काठमाडौंमा छलफल भएको छ ।

गौमतीका पूर्वविद्यार्थी, पूर्वशिक्षक, अभिभावक लगायतको उपस्थितिमा शनिवार काठमाडौंमा छलफल भएको हो ।

बृहत्तर गौमती विकास समाज र गौमती पूर्वविद्यार्थी समाजको आयोजनामा भएको सो कार्यक्रममा गौमतीलाई समय सापेक्ष कसरी बनाउँदै लैजाने र शैक्षिण गुणस्तर कसरी सुधार गर्दै लैजाने लगायतका विषयमा छलफल भएको थियो ।

कार्यक्रममा बृहत्तर गौमती विकास समाजका अध्यक्ष तथा गौमतीका पूर्वप्रधानाध्यापक कृष्णप्रसाद ढकालले गौमतीको शैक्षिक गुणस्तर उकास्नका लागि सबै एकजुट भएर अघि बढ्नुपर्ने बताए ।

गौमतीको बृहत्तर विकासका लागि अब चाँडै संस्थागत रुपमा अघि बढ्ने निधो भएको छ । त्यसका लागि विधान तयार भइसकेको जानकारी उनले दिए ।

विधानबारे बृहत्तर गौमती विकास समाजका तर्फबाट पूर्वप्रधानाध्यापक गोकर्ण थापाले जानकारी गराए । विधानको उद्देश्य, योजना र रणनीतिबारे उनले प्रष्ट पारे ।

गौमतीका शिक्षक शंकर ढकालले बृहत्तर गौमती विकास समाज स्थापनाको औचित्य र आवश्यकताका बारेमा प्रष्ट्याएका थिए ।

कार्यक्रममा पूर्वशिक्षक डविन्द्र थापा, पूर्वविद्यार्थीहरु अमरेशचन्द्र बैदार, यादव गुरुङ, महेन्द्र सापकोटा लगायतका सुझाव राखेका थिए ।

कार्यक्रममा स्वागत गर्दै गौमती पूर्वविद्यार्थी समाजका अध्यक्ष डण्ड गुरुङले अब ग्रेटर गौमतीको अभियानलाई सशक्त रुपमा अघि बढाउनुपर्ने आवश्यकता औंल्याएका थिए ।

कार्यक्रममा विद्यालय व्यवस्थापन समितिका अध्यक्ष कर्ण घिसिङ, कमलामाई नगरपालिका ६ का अध्यक्ष उज्वल थापा, क्याम्पस प्रमुख दिलबहादुर केसी, विद्यालयका प्रधानाध्यापक दिपक बुढाथोकी, अभिभावक विष्णु श्रेष्ठ लगायतको उपस्थिति थियो ।

कार्यक्रम गौमती पूर्वविद्यार्थी समाजका सचिव बरुण लामिछानेले सञ्चालन गरेका थिए ।