काकाठमाडौं ८ साउन । बंगलादेशमा चर्किरहेको आरक्षणविरोधी आन्दोलका बीच त्यहाँका प्रधानमन्त्री कार्यालय, केन्द्रीय बैंक र प्रहरीका आधिकारिक वेबसाइट द रेजिस्टेन्सु नामक समूहले ह्याक गरेको छ।

तीनवटै वेबसाइटमा अपरेसन हन्टडाउन, विद्यार्थीहरूको हत्या रोकौँ, अब यो विरोध मात्र नभई एक युद्ध हो भनी रातो अक्षरमा समान सन्देश लेखिएका छन्।

सन्देशमा विद्यार्थीको शान्तिपूर्ण विरोध प्रदर्शनलाई सरकारलगायत राजनीतिक सहयोगीको क्रूर हिंसा र हत्याको सामना गर्नुपरेको उल्लेख गर्दै अब यो विरोध मात्र नभई न्याय, स्वतन्त्रता र भविष्यका लागि युद्ध भएको जनाइएको छ।

समूहले तत्काल ह्याकर, ओएसआईएनटी अन्वेषक र पत्रकारलाई आफ्नो उद्देश्यमा सहभागी हुन आह्वानसमेत गरेका छन्।

‘न्यायका लागि लडाइँ सुरु भइसकेको छ, तयार रहनुहोस्’, ह्याकरहरूले चेतावनी दिएका छन्।

उनीहरूको बारेमा विवरण उल्लेख नगरी पाँच जना पुरुष र दुईवटा कुकुरसहितको तस्बिर वेबसाइटमा प्रस्तुत गरिएको छ।

बंगलादेशमा सन् १९७१ मा स्वतन्त्रताको लडाइँ लडेकाहरूको सन्तानका लागि प्रदान गरिएको ३० प्रतिशत आरक्षण कोटा प्रणालीमा सुधार माग गर्दै विद्यार्थीहरू लामो समयदेखि आन्दोलनमा छन्।