काठमाडौँ, १४ फागुन । मानवतस्करी मुद्धामा मुछिएका कलाकार राजेन्द्र खड्गीले सो तस्करीमा संलग्न तीन जनाको नाम बताएको खुलासा भएको छ । सिआइबी स्रोतका अनुसार खड्गीले एक नेपाली र दुई कोरियन नागरिकको नाम लिएका छन्।

मानवतस्करी मुद्दामा कोरियन नागरिकहरुको समेत संलग्नता भेटिएपछि केन्द्रीय अनुसन्धान ब्युरो (सिआइबी) ले कोरियन प्रहरीसँगको सहकार्यमा अनुसन्धान गर्ने भएको छ।

हाल दक्षिण कोरियामै रहेका खड्गीका साथी नेत्रबहादुर रानाले मानवतस्करीमा सघाएको खुलासा भएको हो । त्यस्तै अन्य दुई जना कोरियनको नामसमेत खुलेको छ। ती कोरियनहरु नेपाल आएका थिए। उनी लगायत कोरियनलाई पक्राउ गर्न सिआइबीले इन्टरपोलमार्फत कोरियन प्रहरीसँग अनुरोध गरेको छ।

फिल्मको सुटिङका लागि भनेर दूतावासबाट भिसा लिएर दक्षिण कोरिया गएका युवाहरु उतै बेपत्ता भएपछि काठमाडौंस्थित दक्षिण कोरियन दूतावासले प्रहरीमा जाहेरी दिएको थियो। सोही आधारमा सिआइबीले खड्गीलाई माघ २५ गते पक्राउ गरी अनुसन्धान अघि बढाएको हो।

खड्गीले कोरिया गएका युवाहरु नफर्किए आफू जिम्मेवार हुने भन्दै दूतावासमा कागज गरेका थिए। सोही आधारमा सिआइबीले उनलाई पक्राउ गरेको हो।