काठमाडौँ, १३ फागुन । कर्णाली जनअधिकार मञ्चले प्रदेश नं ६ को स्थायी राजधानी कर्णालीभित्र कायम गर्नुपर्ने माग गरेको छ ।

आज आयोजित पत्रकार सम्मेलनमा मञ्चका अध्यक्ष प्रकाश रोकायले स्थायी राजधानी तथा केन्द्र तोक्ने जस्तो महत्वपूर्ण निर्णय गर्दा स्थानीय जनताको भावनालाई सम्मान गरी उनीहरुको चाहनाअनुसार गर्नुपर्ने माग गर्नुभयो ।

मञ्चका महासचिव कमल खत्रीले मुलुकको समग्र भूगोलको १५ प्रतिशत भू–भाग कर्णालीमा रहेको र स्थानीय स्रोत तथा साधनले भरिपूर्ण रहेको उक्त स्थानको राज्य पुनःसंरचनाको नाममा उपेक्षा नगर्न आग्रह गर्नुभयो ।

प्रदेशसभाको शनिबार बसेको बैठकले ६ नं प्रदेशको राजधानी सुर्खेत तोकिसकेको छ । कर्णाली क्षेत्रमा हुम्ला, जुम्ला, मुगु, डोल्पा र कालीकोट रहेकामा मञ्चले ती मध्येबाट नै राजधानी बनाउन माग गरेको हो ।

उक्त माग पूरा नभए चरणबद्ध संघर्षका कार्यक्रम गरी सशक्त आन्दोलन गर्ने जनाइएको छ ।