काठमाडौं, २८ माघ ।  युवा तथा खेलकुद मन्त्री डिगबहादुर लिम्बुले खेल क्षेत्रको विकासलाई सरकारले उच्च प्राथमिकतामा राखेको बताउदै आगामी बजेटमा खेलकुद मन्त्रालयको बजेट उलेख्य रुपमा बृद्धि गर्न पहल गरिरहेको बताएका छन् ।  आइतवार युवा तथा खेलकुद मन्त्रालयमा आयोजित २०७९ साल फागुन १२ देखि १८ सम्म युएईमा आयोजना भएको ICC U-19 Men’s CWC-Asia Qualifier मा बिजेता बनेको नेपाली अण्डर १९ क्रिकेट टोली र एशियन बक्सिङ कन्फडेरेशनको आयोजनामा थाईल्याण्डको राजधानी बैंककमा सम्पन्न ASBC U-22 Asian Men & Women’s Boxing Championship मा पदक जितेका खेलाडी तथा प्रशिक्षकहरुलाई पुर्व घोषित नगद पुरस्कार हस्तान्तरण गर्दै मन्त्री लिम्बूले उक्त कुरा बताएका हुन । उनले प्रक्रियागत समस्याका कारण बिजयी खेलाडीहरुलाई सरकारबाट घोषित नगद पुरस्कार हस्तान्तरणमा ढिलाई भए पनि आगामी दिनमा त्यो समस्या नदोहोरिने आश्वसन दिए । बिजेता अण्डर १९ क्रिकेट खेलाडीहरुलाई जनही ३ लाख रुपैयाँ, मुख्य प्रशिक्षकलाई २ लाख रुपैयाँ, टिम व्यवस्थापक र फिजियोलाई १, १ लाख रुपैयाँ नगद पुरस्कार सम्मान सहित हस्तान्तरण गरिएको थियो । यसैगरि ASBC U-22 Asian Men & Women’s Boxing Championship मा रजत पदक जित्ने खेलाडी सुष्मा तामाङलाई ६ लाख रुपैयाँ, काश्य पदक बिजेताहरु हेमा राई, विशा जबेगु र विजय वाटालाई ३, ३ लाख रुपैयाँ, मुख्य प्रशिक्षक दिपक महर्जनलाई १ लाख ८ हजार रुपैयाँ र सहायक प्रशिक्षकलाई ७२ हजार रुपैयाँ नगद पुरस्कार सहित सम्मानित गर्नुभयो । मन्त्रालयका सचिव रविलाल पन्थको सभापतित्वमा सम्पन्न उक्त कार्यक्रममा बोल्दै राष्ट्रिय खेलकुद परिषदका सदस्य सचिव टंकलाल घिसिङले पुरस्कृत खेलाडीहरुलाई बधाई तथा शुभकामना ज्ञापन गरेका थिए ।