काठमाडौं २९ मंसिर । भारतको मणिपुरमा मारिएका कुकी जनजातिको शव शुक्रबार सामूहिक रूपमा गाडिँदै छ। दाहसंस्कार कार्यक्रम स्थानीय समय बिहान ११ बजे सुरु हुनेछ।

राज्यमा भएको हिंसाको विरोधमा शुक्रबार बिहान ५ बजेदेखि साँझ ५ बजेसम्मका लागि सम्पूर्ण काङपोकपी जिल्लामा १२ घण्टा बन्दको आह्वान गरिएको छ ।

सदर पहाडको आदिवासी एकता समिति (कोटु) ले यस जिल्लाका सबै कुकी(जो समुदायका मानिसलाई शुक्रबार ‘शोक दिवस’ मनाउन र घरघरमा कालो झण्डा फहराउन निर्देशन दिएको छ।

बीबीसी हिन्दीका अनुसार २३ वटा शव काङपोकपी जिल्लाको फैजाङ गाउँमा गाडिनेछ। सामूहिक दाहसंस्कार कार्यक्रमको नारा ‘हाम्रो भोलिका लागि आज आफ्नो बलिदान गर’ राखिएको छ।

मणिपुरमा गत मे ३ मा भएको व्यापक हिंसाको झण्डै आठ महिनापछि बिहीबार बिहान राजधानी इम्फालबाट २३ जनाको शव काङपोकपी पठाइएको हो।

भारतीय वायुसेनाको हेलिकप्टरबाट पठाइएका ती शवमध्ये १९ शव कुकी–जोका छन्। सनाखत हुन नसकेका चार शव पनि छन्।

यी सबै शवलाई कुकीजो चलनअनुसार सम्मानपूर्वक अन्त्येष्टि गर्न लागिएको हो। कुकी(जोवासीले चिहानमा रातभर शोक मनाउने बताइएको छ।

भारतीय सर्वोच्च अदालतको निर्देशनपछि मेदेखिको हिंसामा मारिएका ६४ जनाको शव राजधानी इम्फालबाट काङपोकपी र चुराचन्दपुर जिल्लामा पठाइएको हो।

जसमध्ये २३ शव काङपोकपी र ४१ शव चुराचन्दपुर पठाइएको बीबीसी हिन्दीले उल्लेख गरेको छ। ती सबै शव धेरै महिनादेखि शवगृहमा बेवारिसे अवस्थामा थिए।

भारतको सर्वोच्च अदालतले सबै शवलाई राम्ररी गाड्न निर्देशन दिएको थियो।